र्यापर आशिष राना ‘लाहुरे’ले पहिलो महिला प्रधानमन्त्रीलाई शुभकामना दिँदै यस्तो भने

इटहरी/ जेनजी आन्दोलन पश्चात् लामो रस्साकस्सी पछि नेपालको पहिलो महिला प्रधानमन्त्रीमा सुशीला कार्कीको नाम टुङ्गो लागेसँगै लोकप्रिय र्यापर आशिष राना मगर ‘लाहुरे’ले सामाजिक सञ्जालमार्फत आफ्नो अभिव्यक्ति सार्वजनिक गरेका छन् । फेसबुकमा स्ट्याटस लेख्दै उनले नेपालले पहिलो महिला प्रधानमन्त्री पाएकोमा सम्पूर्ण नेपालीलाई बधाई दिएका छन् ।

कार्कीको व्यक्तिगत विवरण वा पृष्ठभूमि धेरै थाहा नभए पनि नेपाली जनता आशाको डोरी समात्न पाएकोमा आफू अत्यन्त खुसी र आशावादी भएको उनले उल्लेख गरेका छन् । लाहुरेले नेपालको राजनीतिक इतिहास स्मरण गर्दै २००७ सालपछि धेरै पार्टी, नीति र नेताहरू आए पनि जनताले खासै परिवर्तन अनुभव गर्न नसकेको पीडा व्यक्त गरे ।

उनका अनुसार, नेताहरूले जनतालाई वर्षौँदेखि केवल झूटो सपना र आश्वासन मात्र बाँड्दै आएको अवस्था छ । उनले नेपाली जनताको सपना सामान्य रहेको भन्दै रातारात नेपाललाई सिंगापुर वा स्वीट्जरल्यान्ड बनाउनुपर्ने चाहना नभएको स्पष्ट पारे । उनले भने, “हामी मेहनती र इमानदार नेपालीहरूलाई केवल राम्रो वातावरण र स्वच्छ राजनीतिक माहोल चाहिएको हो । हामीलाई मेहनत र इमानदार साथ काम गर्ने वातावरण दिन सकियो भने, दस नङ्रा घिसारेर, रगत-पसिना बगाएर पनि आफ्नै देशलाई विकासतर्फ लैजान सक्ने सामर्थ्य हामीसँगै छ।”

@parikalanewsofficial