जेनजी आन्दोलनलाई समर्थन गरेको भन्दै अभिनेता दीपक राज गिरीलाई धम्की

इटहरी/ अभिनेता तथा निर्माता दीपक राज गिरीले आफूलाई धम्की आउने क्रम बढेको बताएका छन् । उनले सामाजिक सञ्जाल फेसबुकमार्फत सार्वजनिक गरेको एक स्ट्याटसमा विभिन्न व्यक्तिहरूले फोन र इनबक्समार्फत धम्की दिइरहेको खुलाएका छन् । उनका अनुसार धम्की दिनेहरूले “कलाकार भएर जेनजीको आन्दोलनलाई समर्थन गर्ने ? एक–एक हिसाब राखिन्छ” जस्ता चेतावनी दिएका छन् । गिरीले केही फोन कलहरूको रेकर्डसमेत सुरक्षित राखेको उल्लेख गरेका छन् ।

स्ट्याटसमा उनले आन्दोलनप्रति आफ्नो समर्थनबारे पनि स्पष्ट पारेका छन् । उनका अनुसार आन्दोलनको पहिलो दिन अन्य कलाकारलगायत आफूले भ्रष्टाचारविरुद्धको अभियानलाई शान्तिपूर्ण रहोस् भन्ने शुभकामना मात्र दिएका थिए । तर दोस्रो दिन स्कुल–कलेजका विद्यार्थीहरू गोली लागेर ढलेको दृश्य देखेपछि चुप बस्न नसकेको उनले बताए । त्यसपछि उनले प्रधानमन्त्रीलाई हिंसा रोक्नका लागि राजीनामा दिन आग्रह गरेको र धेरै कलाकारहरू सडकमा उत्रिएको स्मरण गरे ।

गिरीले स्टाटसमा भनेका छन्, “आन्दोलनको क्रममा धेरै अभिभावक आफ्ना बच्चा गुमाएको पीडामा सडकमा थिए । राजीनामा ढिलो भए जसका कारण हिंसा थप भड्कियो । त्यसको फाइदा विभिन्न स्वार्थी समूहहरूले लिए ।” उनले सामाजिक सञ्जालमार्फत कलाकार र केही राजनीतिकर्मीहरूले लगातार शान्ति कायम राख्न अनुरोध गरेको तर पनि आन्दोलनले अर्को मोड लिएको बताए । उनका अनुसार आन्दोलन सफल भएपनि त्यसले ल्याएको विनाश र पीडाले कसैलाई खुशी बनाउन सकेन ।

@parikalanewsofficial

आफूलाई आएको धम्कीबारे प्रस्ट पार्दै उनले भनेका छन्, “केही सरकारी पक्षधरले बदला लिने कुरा गर्दै स्ट्याटस राखेका छन् । मलाई आएको फोन र म्यासेजहरू पनि त्यसकै भाग हो ।” २०४६ सालको आन्दोलनदेखि ६२/६३ सम्म आफू जनताको पक्षमा उभिएको स्मरण गर्दै गिरीले हालको आन्दोलनमा पनि कुनै स्वार्थ वा लोभले होइन, नयाँ पुस्ताले उठाएको सुशासन र भ्रष्टाचारविरोधी मुद्दाको समर्थनका कारण साथ दिएको स्पष्ट पारे ।

उनले थपे, “यदि यो अपराध हो भने म पनि अपराधी ठहरिन्छु । धम्की दिनेहरूले भनेझैँ भए, म पनि निर्दोष भएर पीडितहरूको सूचीमा थपिनेछु भन्ने चित्त बुझाएको छु ।” अन्त्यमा उनले सबै पक्षलाई गल्ती स्वीकार गर्दै क्रान्ति, प्रतिक्रमण र बदलाको राजनीति त्यागेर देश पुनर्निर्माणतर्फ लाग्न आह्वान गरेका छन् ।