दीपक-रोहित भर्सेस सन्तोष: सुरुभयो स्ट्याटस, कमेन्ट, घोचपेच र आरोप प्रत्यारोप

इटहरी/ नेपाली फिल्म क्षेत्रका हस्तीहरुले अब फेसबुकमा वार सुरु गरेका छन् । फेसबुकमा स्ट्याटस, कमेन्ट गर्दै घोचपेच र आरोप प्रत्यारोप लगाउन सुरु गरेका छन् । निर्माता रोहित अधिकारीले सोमबार देखि नै कसैलाई टार्गेट गरेर स्ट्याटस पोस्ट गरिरहेका थिए । यसैविचमा आज मंगलबार निर्माता तथा अभिनेता दीपक राज गिरीले निर्माता तथा निर्देशक सन्तोष सेनालाई टार्गेट गरेर फेसबुकमा एक पोस्ट गरे ।

सो पोस्टपछि रोहित अधिकारी, दीपक राज गिरी र सन्तोष सेनको एकअर्का बीच आरोप प्रत्यारोपको खेल सामाजिक सञ्जालमा सुरु भएको छ । यो खेलमा रोहित-दीपक भर्सेस सन्तोष देखिन्छन् । अब यसको अन्त्य कसरी हुन्छ भन्ने अनुमान लगाउन सकिन्न । यी ३ जनै निर्माता तथा निर्देशक नेपाली फिल्म क्षेत्रका दरिलो खम्बा हुन, मिलेर जानुपर्नेमा यसरी सामाजिक सञ्जालमा रोइलो गर्दा पक्कै राम्रो सन्देश जाँदैन ।

दीपकले मंगलबार एका बिहानै “फेसबुकमा चोरको खुट्टा काट भन्दा खुट्टा उचाल्यो चोरले ! बिचरो न त ब्यग्य बुझ्छ! न बौद्धिकता थाहा छ, बुरूक बरूक सॉढे उफ्रे झै उफ्रिन्छ ! माया लाग्छ” भनेर लेख्छन् । यो स्ट्याटसले सिधै सन्तोष सेन तर्फ तीर हानेको छ । यता सेन पनि चुप बस्नेमा पर्दैनन् । उनले दिपकको सो पोष्टको कमेन्टमा एक लामो जवाफ फर्काउँछन् । तर, दीपकले सो कमेन्ट डिलिट गरेको भन्दै गिरीलाई मेन्सन नै गरेर सो कमेन्टलाई स्ट्याटसको रुपमा आफ्नो फेसबुकमा सेनले पोस्ट गर्छन् ।

अनि सुरु हुन्छ फेसबुकमा कमेन्ट, पोस्ट अनि घोचपेचसँगै आरोप प्रत्यारोप । सन्तोषले दीपकलाई मेन्सन गरेर, कमेन्ट डिलिट गरेपछि स्टाटस लेख्न बाध्य भएको बताउँदै सेनले गिरीलाई “तिम्रो सोचमै पाप छ” भन्दै लाखौँ दर्शकको भावनासँग खेलबाड नगर्न चेतावनी दिएका छन् । उनले ‘बलिदान’ को पोस्टमा आएका नकारात्मक कमेन्टहरू दीपक राज गिरीको समूहबाट गराइएको आशंका गर्दै प्रश्न उठाएका छन् । “हाम्रो बलिदानको पोस्टमा आउने नकारात्मक कमेन्टहरू के तिम्रो समूहकै काम हो ?” सेनले लेखेका छन् ।

फेक अकाउन्टमार्फत घटिया कमेन्ट गराउने, दर्शकको भावनामा चोट पुर्‍याउने र उल्टै आफूमाथि आरोप लगाउने सोचलाई उनले कलाकारको लागि अपमानजनक ठहर गरेका छन् । “कलाकार र सिर्जनाकर्ताबीच प्रतिस्पर्धा हुनुपर्छ, तर त्यो सिर्जनामा र गुणस्तरमा हुनुपर्छ” सेनको भनाइ छ ।कालीमाता र पशुपतिनाथको कसम खाँदै उनले आफैंलाई अगाडि बढाउन अरूलाई गिराउने गलत प्रवृत्तिमा कहिल्यै संलग्न नभएको दाबी गरेका छन् ।

सेनले “यदि वास्तवमै मैले कहिल्यै कसैलाई नकारात्मक कमेन्ट गर्न लगाएको छु भने, मैले “बलिदान”को सुरुवात नै कालीमाताको चरण छोएर गरेको हु, कालीमाता र पशुपतिनाथ समक्ष प्रार्थना गर्दछु, यसै क्षण मेरो जीवन अन्त्य होस् ।” लेखेका छन् । आफू र आफ्नो टिमले ३–४ वर्षदेखि दर्शकलाई केही अर्थपूर्ण सिर्जना दिन प्रयासरत रहेको उल्लेख गर्दै कलालाई सम्मान गर्न सबैलाई आग्रह गरेका छन् । सेनको यो स्ट्याटस पछि जवाफमा पुनः दीपकले व्यङ्ग्य पनि नबुझ्ने बौद्धिकता नभएको भन्दै “चोरको खुट्टा काट भन्दा खुट्टा उचाल्यो चोरले ! बिचरो न त ब्यग्य बुझ्छ! न बौद्धिकता थाहा छ, बुरूक बरूक सॉढे उफ्रे झै उफ्रिन्छ ! माया लाग्छ” भनेर लेख्छन् ।

@parikalanewsofficial

यता निर्माता रोहित अधिकारीले भने दिपककाे सो स्ट्याटस हरुलाई आफ्नो फेसबुक प्रोफाइलमा शेयर गरिरहेका छन् । यस्तै निर्माता अधिकारीले सन्तोष सेनलाई मेन्सन गर्दै एक व्यक्तिको धम्कीपूर्ण म्यासेज र कमेन्टको स्क्रीनसट राख्दै “इनबक्समा पनि गाली आको छ, सन्तोष सेन जी तपाईको यो झोले हैन, तपाईबाट परिचालित छैन भनेर कसरी ट्रस्ट गर्नु ?” भनेर प्रश्न तेर्स्याएका छन् ।

सामाजिक सञ्जालमा छताछुल्ल भएको यो आरोप प्रत्यारोपलाई अब, यी ३ जना मेकर्सले कसरी सटआउट गर्छन् वा अझै लम्ब्याउँछन् भन्ने कुरा पर्खाइको विषय हो । हुन त अघिल्ला वर्षमा पनि यस्तै भएको उदाहरण छन्, तर यो हदसम्म भने पुगेको अवस्था थिएन । आ-आफ्नो तर्फबाट एक अर्काको फिल्म सफल प्रदर्शनमा रचनात्मक भूमिका खेल्नुपर्नेमा फिल्म क्षेत्रका यी खम्बाहरूको यो शैलीको उपस्थितिले नेपाली फिल्म उद्योग कता जाँदैछ ? भन्ने गम्भीर प्रश्न खडा भएको छ ।