अमेरिकाको सबैभन्दा ठूलो फिल्म चेन एएमसीमा ‘बलिदान’, १ हजारबढी सो पाउने अनुमान

इटहरी/ नेपाली फिल्म इतिहासमा नयाँ अध्याय कोर्ने तयारीमा फिल्म ‘बलिदान’ रहेको छ । आगामी दसैँको फूलपातीको अवसर पारेर असोज १३ गतेदेखि रिलिज हुने यो बहुप्रतीक्षित फिल्म पहिलो पटक अमेरिकाको सबैभन्दा ठूलो फिल्म चेन एएमसी (AMC) मा प्रदर्शन हुँदैछ । निर्देशक सन्तोष सेनसहित र अभिनेता समीर भट्ट, सौगात मल्ल लगायतको प्रमुख भूमिका रहेको यस फिल्मले अमेरिकाभरका २०० भन्दा बढी हलमा करिब एक हजार शो पाउने अनुमान गरिएको छ ।

यसअघि कुनै पनि नेपाली फिल्म एएमसी चेनमा प्रदर्शन नभएको उल्लेख गर्दै निर्देशक सेनले ‘बलिदान’ले नेपाली फिल्मलाई विश्वफिल्ममा नयाँ स्तरमा पुर्‍याउने विश्वास व्यक्त गरेका छन् । एएमसी मात्र नभई अमेरिकी प्रतिष्ठित फिल्म चेनहरू सिनेमार्क, मार्कस र रेगलमा समेत यो फिल्म देखाइने भएको छ ।

यसअघि सार्वजनिक गरिएका पोस्टर र टिजरले नै फिल्मप्रति दर्शकमा ठूलो उत्साह पैदा गरिसकेको छ । आशुसेन फिल्म्सको प्रस्तुतिमा बनेको ‘बलिदान’मा समीर भट्टसँगै सौगात मल्ल, अर्पण थापा, ऋचा शर्मा, कविता राय, हेमन्त बुढाथोकी, प्रेम पुरी र स्वयं निर्देशक सन्तोष सेनले पनि अभिनय गरेका छन् । फिल्मका निर्माता पवन ब्राडफोर्ड बिस्ट र कार्यकारी निर्माता प्रेम पुरी रहेका छन् ।

@parikalanewsofficial

‘बलिदान’लाई नेपाली फिल्मको अन्तर्राष्ट्रिय यात्रामा साहसी कदमका रूपमा हेरिएको छ, जसले नेपाली फिल्मलाई विश्वफिल्ममा अझ बलियो उपस्थिति दिलाउने अपेक्षा गरिएको छ ।