‘रिमै’ गुरुङ समुदाय बुझ्न चाहने भावी पुस्ताका लागि महत्त्वपूर्ण दस्तावेज – दयाहाङ राई

इटहरी/ नेपाली फिल्मप्रेमीले पर्खिरहेको फिल्म ‘रिमै’ यही शुक्रबार अर्थात् भदौ २० गतेदेखि प्रदर्शनमा आउँदैछ । गुरुङ समुदायको कथा, संस्कृति र परम्परालाई केन्द्रमा राखेर तयार गरिएको यो फिल्मलाई टिमले सामान्य मनोरञ्जन मात्र नभई नेपाली समाज र इतिहासका लागि “दस्तावेज” को रूपमा प्रस्तुत गरिरहेको छ । काठमाडौंमा आयोजित पत्रकार भेटघाट कार्यक्रममा अभिनेता दयाहाङ राईले ‘रिमै’लाई गुरुङ समुदाय बुझ्न चाहने भावी पुस्ताका लागि महत्त्वपूर्ण दस्तावेज हुने बताए ।

दयाहाङले भने, “गोरखाको माथिल्लो भेगमा बस्ने गुरुङ समुदायको भाषा, संस्कार र जीवनशैलीलाई नजिकबाट बुझ्नुपर्ने भए यो फिल्म निकै बलियो प्रमाण बन्नेछ।” फिल्मको शीर्षक ‘रिमै’ गुरुङ भाषामा छोरी–चेली भन्ने अर्थमा प्रयोग हुन्छ । अभिनेत्री रिस्मा गुरुङका अनुसार यो शब्द गुरुङ समाजमा छोरीको अनिवार्य भूमिकासँग जोडिएको छ । उनले भनिन्, “हाम्रो समुदायमा छोराभन्दा छोरीको महत्व बढी छ । अन्तिम संस्कारमै पनि छोरी नभएसम्म घरबाट शव उठाउन मिल्दैन । यही सन्देश ‘रिमै’मार्फत देख्न पाइनेछ ।”

गुरुङ कथामा बनेको सशक्त फिल्म भएका कारण उनले यसमा काम गर्न उत्साहित भएको बताईन् । उनी गुरुङ भाषाकै फिल्मबाट मेनस्ट्रिममा प्रवेश गरेकी कलाकार हुन् । निर्देशक खिल बहादुर गुरुङको निर्देशनमा बनेको यस फिल्ममा दयाहाङ राई, अर्पण थापा, रिस्मा गुरुङ, गौमाया गुरुङ, कविता आले मगर, माओत्से गुरुङलगायतको अभिनय छ । साथै, बालकलाकार असिम सुब्बा, प्रेस्टु गुरुङ र प्रश्ना राना मगर पनि देखिनेछन् ।

@parikalanewsofficial

फिल्मको पटकथा कवि तथा निर्देशक उपेन्द्र सुब्बाले लेखेका हुन् भने छायांकन शैलेन्द्र ध्वज कार्कीले गरेका छन् । कार्यकारी निर्माता वीरबल घले रहेका यस फिल्ममा टिका गुरुङ, जित यात्री गुरुङ र दुन बहादुर घले निर्माताको रूपमा छन् । संगीतमा दीपक शर्मा र थानेश्वर गौतम, सम्पादनमा मित्र डि गुरुङ, मुख्य सहायक निर्देशकमा किरण चाम्लिङ राई, र प्रोडक्सन म्यानेजरमा बिष्णु मैनाली रहेका छन् ।