इटहरी/ नेपालको अग्रणी सांगीतिक व्याण्ड नेपथ्यले डेनमार्कको ऐतिहासिक पुलेन हलमा भव्य कन्सर्ट प्रस्तुत गर्दै हजारौं दर्शकलाई मन्त्रमुग्ध पारेको छ । दुई घण्टासम्म चलेको कार्यक्रममा गायक अमृत गुरुङले ‘कोशीको पानी’ बाट सुरुवात गर्दा हल ताली र हुटिङले गुन्जिएको थियो । एकपछि अर्को चर्चित गीत प्रस्तुत गर्दै व्याण्डले डेनमार्कमा मात्र नभई फिनल्याण्ड, जर्मनी, नर्वे, अष्ट्रिया, पोल्याण्ड, स्विडेन र बेल्जियमबाट आएका दर्शकलाई समेत नेपाली संगीतको लयमा नचाएको थियो ।
यो कार्यक्रमलाई नेपाली राजदूत सुम्निमा तुलाधरले “संगीतिक कार्यक्रम मात्र नभई नेपाली उत्सव” भन्दै विदेशमा नेपाली समुदायलाई एक ठाउँमा ल्याएको विशेष क्षणको रूपमा व्याख्या गरिन् । नेको इभेन्ट्सको व्यवस्थापनमा सम्पन्न कन्सर्टमा अमृत गुरुङलाई ध्रुव लामा (ड्रम), सुविन शाक्य (बेस गितार), नीरज गुरुङ (गितार), शान्ति रायमाझी (मादल) र दिनेशराज रेग्मी (किबोर्ड)ले साथ दिएका थिए ।
कार्यक्रमपछि आयोजक पवन पाण्डेले लामो समयको सपना पूरा भएको र दर्शक खुशीसाथ फर्किनु नै आफ्ना लागि ठूलो उपलब्धि भएको बताए । नौ वर्षपछि डेनमार्क फर्किएको नेपथ्यले यो कन्सर्टमार्फत संगीतलाई नेपाली समुदायको एकताको पुल बनाएर फर्किएको छ ।
@parikalanewsofficial
Discussion about this post