वर्षा राउत र विजय बरालको पहिलो क्ल्यापसँगै ‘मालती मंगले’को शुभारम्भ

इटहरी/ काठमाडौंमा औपचारिक कार्यक्रमसहित नेपाली फिल्म ‘मालती मंगले’ को निर्माण यात्रा प्रारम्भ भएको छ । गायक तथा निर्माता रामकृष्ण ढकालले निर्माण गर्न लागेको यस फिल्मको स्क्रिप्ट तथा क्यामेरा पूजापछि पहिलो क्ल्याप ढकालका अभिभावक गोपाल कर्माचार्यले दिएका थिए । त्यही अवसरमा अभिनेता विजय बराल र अभिनेत्री वर्षा राउतले पहिलो दृश्य अभिनय गर्दै छायाङ्कनको शुभारम्भ समेत गरे ।

कार्यक्रममा निर्माता समेत रहेका ढकालले ‘राम्रो र स्तरीय फिल्म निर्माण गर्ने प्रतिबद्धता’ व्यक्त गर्दै नेपाली समाजसँग जोडिने भावनात्मक कथा दर्शकसामु पस्किने विश्वास दिलाए । त्यस्तै, प्रमुख कलाकार विजय बराल, वर्षा राउत र मेक्सम गौडेलले ‘मालती मंगले’ आफ्नो अभिनय यात्रामा विशेष मोड बन्ने अपेक्षा राखेका छन् ।

फिल्ममा विजय, वर्षा र मेक्समसँगै सुवर्ण थापा, प्रकाश घिमिरे, सरिता गिरी, सुस्मा निरौला, सुनिल तामाङ, उमेश सुनाम, शकु शाह, सुचित्रा उप्रेती, दिनेश शाही, रिजन परियार, तारा शर्मा, गीता श्री, राज पंगेनी, सुस्मिता गुरुङ, सागर भट्टराईलगायतका कलाकारको समेत अभिनय रहनेछ । निर्देशन प्रकु पाण्डेले गर्ने फिल्ममा कथा स्वयं पाण्डेकै लेखन हो । यो फिल्मको कथा पारिवारिक भावनासँग जोडिएको प्रेमकथामा आधारित रहने जनाइएको छ ।

कार्यकारी निर्माता सागर ज्ञवालीका अनुसार फिल्मको मुख्य छायाङ्कन तनहुँ र स्याङ्जाका सुन्दर भूभागमा गरिनेछ भने शनिवारदेखि छायाङ्कन सुरु हुने तयारी छ । रानी म्युजिक इन्टरनेशनल प्रा.लि.को ब्यानरमा युनी इन्टरटेनमेन्टको सहकार्यमा निर्माण हुने यस फिल्ममा सह–निर्माता रविन श्रेष्ठ, बाबु सुवेदी, मनोज बजगाईँ र ईश्वर बजगाईँ रहेका छन् ।

@parikalanewsofficial

‘मालती मंगले’ का छायाङ्कन निर्देशक महेश पौडेल, सम्पादक रोमी तण्डुकार, रङ्ग संयोजक कृष्ण भण्डारी रहेका छन् । गीत राजेन्द्र थापा, आनन्द अधिकारी, गोपाल अधिकारी र हर्क साउदले लेख्नेछन् भने सङ्गीतमा हरि लम्साल, राजनराज सिवाकोटी, एसडी योगी र उज्ज्वल सागरको संलग्नता रहनेछ । त्यस्तै, कस्ट्युम डिजाइन रवि पोखरेल, कला निर्देशक मनोज बोगटी, प्रोडक्सन डिजाइनर रिजन परिया र प्रमुख सहायक निर्देशक शिशिर पोखरेल रहनेछन् ।