नेपालमै पहिलोपल्ट ५१०० मिटर उचाइमा ‘जय जय शङ्कर’ गीतको भिडियो छायांकन

इटहरी/ भगवान् महादेवप्रति समर्पित भक्ति गीत ‘जय जय शङ्कर’ सोमबार काठमाडौंको नयाँ बानेश्वरस्थित आईएनआई सिनेमाजमा विशेष कार्यक्रममार्फत सार्वजनिक गरिएको छ । गायक सुगम पोखरेलको स्वरमा रहेको यस गीतलाई नेपाली कांग्रेसका महामन्त्री गगनकुमार थापा र कर्णाली प्रदेशका पूर्वमुख्यमन्त्री जीवनबहादुर शाहीले संयुक्त रूपमा लोकार्पण गरेका हुन् ।

डिजिसेन्स नेपाल प्रा. लि.ले निर्माण गरेको गीतमा स्वर्गीय नातिकाजीको मौलिक सङ्गीत रहेको छ भने मोहित मुनालले आधुनिक शैलीमा पुनः संयोजन गरेका छन् । विजय अधिकारीले थप शब्द र निर्देशन गरेका यस भिडियोमा कलाकार बद्रीप्रसाद तिवारीको एकल अभिनय देख्न सकिन्छ । विशेषत: भिडियो हुम्ला जिल्लाको लिमी उपत्यकाको लाप्चामा खिचिएको हो, जुन समुद्री सतहदेखि करिब ५१०० मिटरको उचाइमा अवस्थित छ । हेर्नुस् भिडियो ।

यहाँबाट प्रत्यक्ष रूपमा कैलाश पर्वत र मानसरोवर ताल देखिने भएकाले यस स्थानलाई धार्मिक, सांस्कृतिक र पर्यटन दृष्टिले अद्वितीय मानिन्छ । निर्माण टिमले संसारमै पहिलोपटक यति दुर्गम क्षेत्रमा म्युजिक भिडियो खिचिएको दाबी समेत गरेको छ । भिडियोमा किरण थापाको कोरियोग्राफी, हरि हुमागाईँको छायाङ्कन निर्देशन र भरत रेग्मीको सम्पादन रहेको छ । निर्माण नियन्त्रक दिपेन गौतम ‘माइकल’ हुन् ।