रिमै ट्रेलर: ग्रामीण परिवेशको जीवनशैली, प्रेम, संघर्ष र सामाजिक यथार्थ

इटहरी/ दयाहाङ राई र रिश्मा गुरुङ अभिनीत प्रतिक्षित फिल्म ‘रिमै’को ट्रेलर सार्वजनिक भएको छ । करीब साढे तीन मिनेट लामो ट्रेलरले गाउँको जीवनशैली, प्रेम, संघर्ष र सामाजिक यथार्थलाई प्रभावकारी ढङ्गले उतारेको देखिन्छ । ग्रामीण परिवेशमा दयाहाङले निर्वाह गरेको पात्र प्रेम र परिवारबीचको संघर्षमा अल्झिएको छ भने रिश्मासँगको भावनात्मक केमिस्ट्रीले कथालाई थप जीवन्त बनाएको छ ।

अर्पण थापा र गौमाया गुरुङले कथामा गहिराइ थपेका छन् भने निर्देशक खिल बहादुर गुरुङले परम्परा र आधुनिक जीवनशैलीबीचको टकरावलाई पर्दामा उतार्ने संकेत दिएका छन् । ट्रेलरमा संवाद, छायांकन र ब्याकग्राउन्ड संगीतले दर्शकलाई गाउँको माटो र संस्कृतिसँग जोड्न सफल देखिन्छ । यसअघि सार्वजनिक पोस्टर र टिजरले चर्चा कमाइसकेकाले ट्रेलरले पनि दर्शकमाझ थप उत्साह जगाएको छ । हेर्नुस् ट्रेलर ।

गोरखा सिरानचोक एण्ड लिगलिगकोट फिल्मस् प्रालीको प्रस्तुति र रोटेपिङ इन्टरटेनमेन्टको सहकार्यमा बनेको यस फिल्ममा दयाहाङ राई, अर्पण थापा, रिश्मा गुरुङ, गौमाया गुरुङ, कविता आले मगर, माओत्से गुरुङ, पुस्कर गुरुङ, वीरमाया गुरुङ, वीरवल घले, डिबी गुरुङ, टेक गुरुङ तथा बालकलाकार असिम सुब्बा, प्रेस्टु गुरुङ र प्रश्ना राना मगरको पनि अभिनय रहेको छ ।

@parikalanewsofficial

फिल्मको पटकथा कवि तथा निर्देशक उपेन्द्र सुब्बाले लेखेका हुन् भने छायांकन शैलेन्द्र ध्वज कार्कीले गरेका हुन् । वीरवल घले कार्यकारी निर्माता रहेको फिल्ममा टिका गुरुङ, जित यात्री गुरुङ र दुन बहादुर घले निर्माता र बिनु गुरुङ, रोशन भट्टराई तथा राजेश घिमिरे सह-निर्माताका रूपमा छन् । संगीतमा दीपक शर्मा र थानेश्वर गौतम छन् भने किरण चाम्लिङ राई मुख्य सहायक निर्देशकका रूपमा रहेका छन्
विष्णु मैनाली प्रोडक्सन म्यानेजरका रूपमा र मित्र डी गुरुङ सम्पादकका रूपमा रहेका छन् ।