धमाधम वर्कसपमा ‘मालती मंगले’, भाद्र दोश्रो सातादेखि छायांकन हुने

इटहरी/ नेपाली फिल्म ‘मालती मंगले’ छायाङ्कनको तयारीमा रहेको बेला यसको कार्यशाला काठमाडौंमा धमाधम सञ्चालन भइरहेको छ । पटकथा तथा संवाद लेखक संयोग गुरागाईँको संयोजनमा भइरहेको वर्कसपमा अभिनेता विजय बराल, अभिनेत्री वर्षा राउत, सुवर्ण थापा, मेक्सम गौडेल, प्रकाश घिमिरे, सरिता गिरी, सुस्मा निरौला, सुनिल तामाङ, उमेश सुनाम, शकु शाह, सुचित्रा उप्रेती, दिनेश जङ्ग ठकुरी, रिजन परियार, सागर भट्टराईलगायत कलाकारहरूको सहभागिता रहेको छ ।

कार्यशालामा कलाकारहरूले आफूले निर्वाह गर्ने पात्रलाई अझै गहिराइमा बुझ्ने अवसर पाएका छन् । अभिनेता विजय बरालले फिल्मले नेपाली समाजको यथार्थ जीवनलाई रोचक शैलीमा प्रस्तुत गर्ने विश्वास व्यक्त गर्दै वर्कसपले आफूलाई भूमिकासँग नजिक ल्याएको बताए । त्यस्तै, अभिनेत्री वर्षा राउतले यसलाई आफ्नो पात्रमा ढल्न महत्त्वपूर्ण अवसरको रूपमा लिएकी छिन् ।

निर्देशक प्रकु पाण्डेले लेखेको कथामा आधारित ‘मालती मंगले’को पटकथा तथा संवाद गुरागाईँले तयार पारेका हुन् । तनहुँ र स्याङ्जाका विभिन्न स्थानमा यही भाद्रको दोश्रो सातादेखि छायाङ्कन सुरु हुने यस फिल्मका कार्यकारी निर्माता सागर ज्ञवाली हुन् । रानी म्युजिक इन्टरनेशनल प्रा.लि. र युनी इन्टरटेनमेन्टको सहकार्यमा निर्माण हुने यो फिल्मका निर्माता लोकप्रिय गायक रामकृष्ण ढकाल रहेका छन् ।

@parikalanewsofficial

यस्तै सह निर्माता रविन श्रेष्ठ र बाबु सुवेदी हुन् भने छायाङ्कन निर्देशक महेश पौडेल, सम्पादक रोमी तण्डुकार, रङ संयोजक कृष्ण भण्डारी रहेका छन् । गीतमा राजेन्द्र थापा, आनन्द अधिकारी र गोपाल अधिकारीका शब्द रहनुका साथै हरि लम्साल, राजनराज सिवाकोटी र उज्ज्वल सागरले संगीत भर्नेछन् । ‘मालती मंगले’ एक पारिवारिक प्रेमकथा हुने अपेक्षा गरिएको छ ।