११ दिन लगाएर खिचेको ‘माईतीघर’ फिल्मको टाइटल गीत निर्माणमा ५० लाख खर्च

इटहरी/ प्रतीक्षित फिल्म ‘माइतीघर’को शीर्ष गीतलाई लिएर निर्माणपक्षले दर्शकमाझ ठूलो सरप्राइज ल्याउन लागेको छ । फिल्मका निर्माता रोहित अधिकारीका अनुसार यस गीतलाई ११ दिनसम्म छायांकन गरिएको छ भने यही गीतको लागि मात्र ५० लाख रुपैयाँभन्दा बढीको लगानी लागेको छ । असोज १३ गतेदेखि रिलिज हुन लागेको फिल्म माईतीघरको प्रचारलाई अझ सशक्त बनाउन यो गीत महत्वपूर्ण हतियार हुने विश्वास निर्माणपक्षको रहेको छ ।

निर्माता अधिकारीका अनुसार बाग्लुङमा खिचिएका पुराना दृश्यलाई प्रयोग नगरी सम्पूर्ण भिडियो नयाँ रुपमा खिचिएको हो । कविराज गहतराजको कोरियोग्राफीमा नृत्य गरेका मुख्य कलाकार उपासना सिंह ठकुरी र श्यामाश्री शेर्पासँगै ठूलो कोरस टोलीलाई पनि समावेश गरिएको छ । यसैले लागत बढेको उनले बताएका छन् । आउँदो साताभित्र सार्वजनिक हुने यस गीतमा भारतीय गायिका सञ्जिवनीको स्वर छ । साथै, यसै गीतमा आधारित भिडियो प्रतियोगिता समेत घोषणा गरिएको छ, जसमा उत्कृष्ट भिडियो सिर्जना गर्ने एक जनालाई ५ लाख रुपैयाँ पुरस्कार दिइनेछ ।

@parikalanewsofficial

मिलन तामाङ निर्देशित यस फिल्ममा केदार प्रसाद घिमिरे ‘माग्ने बुढा’, प्रकाश सपुत, धिरज मगर, उपासना सिंह ठकुरी, श्यामाश्री शेर्पा, युवराज लामा, बुद्धि तामाङ, शिशिर वाङ्देल, रजनी गुरुङ, सन्तोष शाही, फूलकुमार बमजम र संगीता थापालगायतको अभिनय रहेको छ । चन्द्रकुमार दोङको कथा, रामशरण पाठकको पटकथा तथा संवाद रहेको ‘माइतीघर’मा सुशन प्रजापतिको डीओपी, सुरेन्द्र पौडेलको सम्पादन छ भने रविन शेरचन र धिरज तामाङले लगानी गरेका छन् । कार्यकारी निर्माता ईश्वर श्रेष्ठ र निरज कटुवाल हुन् ।