इटहरी/ निर्माणको तयारीमा रहेको नेपाली कथानक चलचित्र ‘रङ्गेली ग्याङ्स्टार’मा अभिनेता अर्पण थापा र अभिनेत्री मिरुना मगर मुख्य कलाकारको रुपमा फाइनल भएका छन् । बिग बजेटमा निर्माण हुने ‘रङ्गेली ग्याङ्स्टार’का लागी निर्माण युनिटले यी २ कलाकारसंग कागजी सम्झौता समेत गरिसकेको जानकारी परिकला न्युजलाई प्राप्त भएको छ । मोरङ जिल्लामा अवस्थित रङ्गेली भन्ने ठाउँ र आसपासमा छायांकन हुने फिल्मका लागी अन्य कलाकारहरु भने अडिसन मार्फत फाइनल गरिने जनाईएको छ ।
ग्याङ्स्टार लाईफको कथा बोल्ने यो फिल्म प्लानेट फिल्मस एण्ड प्याराडाइज पिक्चर्सको ब्यानरमा निर्माण हुनेछ भने जितेन्द्र खतिवडा यसको कार्यकारी निर्माता हुन् । निर्माण युनिटले फिल्मका लागि आवस्यक अन्य कलाकारहरूको अडिसन यहि साउन २१ गते इटहरीमा राखेको छ । अर्जुन सुवेदीको लेखन तथा निर्देशन रहने फिल्मका लागी २० भन्दा बढी २५ देखि ६५ वर्ष उमेर समुहका पुरुष कलाकार तथा २४ देखि ६५ वर्ष उमेर समुहका ३ जना महिला कलाकार अडिसनबाट छनौट गरिने भएको छ ।
रङ्गेली ग्याङ्स्टारका लागी इच्छुक मधेसी, मङोलियन र छेत्री-बाहुन मुल तथा वर्णका कलाकारहरू प्राथमिकतामा पर्नेछन् । इटहरीमा अवस्थित पुर्वान्चल ईन्स्टिच्युट अफ फिल्म एण्ड टेलिभिजनमा बिहान १० बजेदेखि सुरु गरिने अडिसनका लागी कुनै शुल्क लाग्नेछैन । इच्छुकले थप जानकारी लिन चाहेमा ९८२०७५८०९० मा सम्पर्क गरेर बुझ्न सकिनेछ । हाल कथा लेखनको कार्य भैरहेको फिल्मका लागी अन्य केही चल्तीका कलाकारहरुलाई समेत प्रस्ताव गरिएको छ ।
Discussion about this post