फिल्म ‘गोबर गणेश’को आज शुभमुहूर्त गर्दै छायांकन सुरु

इटहरी/ नेपाली फिल्म उद्योगमा अर्को नयाँ फिल्मले छायांकन शुभारम्भ गरेको छ । ‘मेरी बास्सै’बाट घर-घरमा परिचित बनेका कलाकार तथा निर्देशक मरिचमान श्रेष्ठ (बल्छी धुर्बे)ले निर्देशन गर्ने फिचर फिल्म ‘गोबर गणेश’ आज काठमाडौंको म्हेपी मन्दिर परिसरमा शुभमुहूर्त गर्दै छायांकन थालिएको हो । कार्यक्रममा निर्देशक श्रेष्ठसहित अधिकांश कलाकारहरूको उपस्थिति थियो ।

शुभमुहूर्तको औपचारिकतामा माग्ने बुढा अर्थात् केदार घिमिरेले नरिवल फोडेर सुरुवात गरेका थिए भने कलाकार रवि गिरीले पहिलो क्ल्याप हानेका थिए । फिल्मको छायांकन काठमाडौंबाट सुरु भई पोखरालगायत विभिन्न स्थानमा हुनेछ । निर्देशक श्रेष्ठका अनुसार करिब ३५ दिनको सेड्युलमा छायांकन सम्पन्न गर्ने योजना छ । उनले भने, “सानो पर्दामा दर्शकले देखाउनुभएको माया र समर्थन जस्तै ठूलो पर्दामा पनि पाउनेमा विश्वस्त छौँ ।”

बल्छी धुर्बे फिल्मस्को ब्यानरमा निर्माण हुने यस फिल्मको प्रमुख अभिनेत्री वर्षा सिवाकोटी हुन् । उनीसँगै मरिचमान श्रेष्ठ, विनोद न्यौपाने, पदम तामाङ, विल्सन विक्रम राई, निर्मल शर्मा, लक्ष्मीनाथ तिमलसेना, राजु याक्छा, रामप्रसाद खनाल, सन्तोष बानिया, सन्दीप लामा, माओत्से गुरुङ, सीतादेवी तिमल्सिना र पुजन घिमिरे (पुकु)को पनि अभिनय रहनेछ ।

@parikalanewsofficial

फिल्ममा तारानाथ न्यौपाने चिफ एडीका रूपमा रहेका छन् भने योगेश काजी शाहले बीजीएम, शिवराम श्रेष्ठले डीओपी, शंकर पाण्डेले प्रोडक्सन, विपीन मल्लले सम्पादन र टौवा स्टुडियोले पब्लिसिटी डिजाइन सम्हाल्नेछन् । डिजिटल पार्टनर ओएसआर डिजिटल र वितरण श्री ब्याकटेस इन्टरटेनमेन्टले गर्नेछन् । मरिचमान श्रेष्ठको पहिलो निर्देशन रहेको यो फिल्म आगामी माघ १ गते रिलिज हुने तय गरिएको छ ।