चर्चा बटुल्दै अभिमन्युको ‘लड्की गोरी’, रिलिजको २ दिनमै १० लाख पटक हेरियो

इटहरी/ नेपाली फिल्म उद्योगमा डान्सिङ तथा लोक लयका गीतहरूको लहर चलेको बेला फिल्म ‘अभिमन्यु: च्याप्टर-१’ ले पनि ‘लड्की गोरी’ नामको गीत सार्वजनिक गरेको छ । सो गीतको भिडियो सार्वजनिक भएको दुई दिनमै १० लाख भ्युज पाउँदै चर्चाको यात्रा तर्फ लम्किएको छ । शुक्रबार रिलिज भएको गीत छोटो समयमा नै चर्चामा आएर दर्शकको मन जित्न सफल भएको हो ।

भोजपुरी लवजमा नेपाली र भोजपुरी दुवै भाषालाई समान रूपले प्रयोग गरिएको छ । यो गीत मेलापात, महोत्सव र विभिन्न उत्सवमा नाच्न मिल्ने खालको भएकाले युवापुस्ताले विशेष रुचाएको फिल्मका निर्माता विनोद पौडेलले बताए । तराई क्षेत्रमा नेपाली शब्दसहित भोजपुरी शैलीमा आएको यो गीत अझ धेरै लोकप्रिय बन्ने अपेक्षा गरिएको छ । हेर्नुस् भिडियो ।

गीतमा शब्द, संगीत र स्वर प्रशान्त शिवाकोटी र प्रेरणा सिंहले दिएका छन् भने संगीत संयोजन विषम आचार्यले गरेका छन् । जुना सुन्दासको आइटम डान्सलाई रोहन विश्वकर्माले कोरियोग्राफी गरेका छन् । सेभेन सिज सिनेमाको प्रस्तुति रहेको फिल्म ‘अभिमन्यु : च्याप्टर–१’ भदौ २७ (सेप्टेम्बर १२) मा नेपालमा रिलिज हुँदैछ । त्यस्तै, यसको हिन्दी भर्सन असोज ६ (सेप्टेम्बर २२) मा वल्र्डवाइड प्रदर्शनमा आउने तयारीमा छ ।

यो फिल्म पैसाको प्रलोभनमा फस्ने र त्यसबाट उम्कन संघर्ष गर्ने पात्रको कथा केन्द्रित छ । यसमा कामेश्वर चौरासिया, सरिता गिरी, गौमाया गुरुङ, लक्ष्मी बर्देबा, शिशिर वाङ्देल, किरण श्रेष्ठ, प्रकाश दाहाल र सुष्मा निरौला मुख्य भूमिकामा देखिनेछन् । सुशान्त गौतमको निर्देशनमा बनेको यो डेब्यु फिल्ममा मुकेश खनालको कथा, मदन थापाको क्रिएटिभ निर्देशन रहेको छ ।

यस्तै शरद महतोको छायांकन, मनोज श्रेष्ठको भिएफएक्स, सुप्रिम पराजुलीको रंगसम्योजन र मदन घिमिरेको सम्पादन रहेको छ । निर्माता विनोद पौडेल र गुञ्जन गिरीसँगै रमेश चौलागाई र हरि श्रेष्ठ सह–निर्माता तथा विशाल लामा, हरि मोक्तान, कृष्ण भट्टराई, नीराजन लुइँटेल र सन्देश श्रेष्ठ कार्यकारी निर्माता रहेका छन् । पोस्ट–प्रोडक्सनको अन्तिम चरणमा पुगेको ‘अभिमन्यु : च्याप्टर–१’ ले गीतमार्फत नै दर्शकको उत्साह जगाएको छ ।