माग्ने राजालाई युनिभर्सल सर्टिफिकेट, सबै उमेर समूहका दर्शकले हेर्न मिल्ने

इटहरी/ यही आउँदो भदौ ६ गतेदेखि रिलिज हुने नेपाली फिल्म ‘माग्ने राजा’ सेन्सर पास भई युनिभर्सल सर्टिफिकेट प्राप्त गरेको छ, जसका कारण यो सबै उमेर समूहका दर्शकका लागि प्रदर्शन योग्य बनेको छ । ऋषि लामिछानेको निर्देशनमा बनेको यो फिल्म अहिले प्रचार–प्रसारको चरम उत्कर्षमा छ ।

यतिबेला मुख्य कलाकार केदार प्रसाद घिमिरे ‘माग्ने बुढा’ र वर्षा शिवाकोटी विभिन्न मिडियामा पुगेर अन्तर्वार्ता दिइरहेका छन् । सामाजिक ड्रामामा आधारित भए पनि कमेडी स्वाद मिसिएको यो कथामा केदार र वर्षासँगै विल्सन विक्रम राई ‘तक्मे बुढा’, शिशिर वाङ्देल, शारदा गिरी र पवित्रा साँकी ‘मिस पबी’ लगायत कलाकारको पनि महत्वपूर्ण भूमिका छ ।

@parikalanewsofficial

कथा, पटकथा र संवाद सामीप्य राज तिमल्सिनाले लेखेका हुन् । आरम्भ प्रोडक्सनको ब्यानरमा बनेको ‘माग्ने राजा’का निर्माता मुनाल घिमिरे र मधुसुदन शर्मा हुन् । छायांकन नरेन्द्र मैनाली, संगीत दीपक शर्मा र बाबुल गिरी, सम्पादन मित्र गुरुङ र पार्श्व संगीत सुजिल कर्माचार्यको छ । फिल्ममा सामाजिक सन्देश, भावनात्मक गहिराइ र मनोरञ्जनको मिश्रण प्रस्तुत गरिएको छ ।