दयाहाङ र मिरुनाको ‘जारी-२’ टिजर: च्याब्रुङको तालमा लिम्बु संस्कृतिको कथा

इटहरी/ दयाहाङ राई, मिरुना मगर र विजय बरालको मुख्य भूमिका रहेको फिल्म ‘जारी-२, सङ अफ च्याब्रुङ’को टिजर सार्वजनिक भएको छ । असोज ३ गते रिलिज हुने यो फिल्मले लिम्बु समुदायको सांस्कृतिक पहिचान च्याब्रुङ बाजाको सेरोफेरोमा आधारित कथा दर्शकसमक्ष ल्याउने संकेत टिजरमार्फत दिएको छ ।

२ मिनेट ३४ सेकेन्ड लामो टिजरको सुरुवात, च्याब्रुङ नाच्न नजान्ने लिम्बुलाई ‘नाङ्गो’ पहाडसँग तुलना गर्ने संवादबाट हुन्छ । यसपछि टिजरले च्याब्रुङलाई लिम्बु समुदायको खुशीको स्वरको रूपमा व्याख्या गर्दै, कथालाई सामाजिक र पारिवारिक उतार–चढावसँग जोडेको देखिन्छ । हेर्नुस् टिजर ।

उपेन्द्र सुब्बाले लेखन र निर्देशन गरेको फिल्मलाई रामबाबु गुरुङ, मधु मिजार र जीवन गुरुङले निर्माण गरेका हुन् । दया, मिरुना र विजयसँगै बुद्धि तामाङ, ऋचा शर्मा, पुष्कर गुरुङ, प्रेम सुब्बा, माओत्से गुरुङ, मानहाङ लावती, विष्णु मोक्तान, कमलमणि नेपाल, अनिल सुब्बा, रेखा लिम्बु, बेदना राई र सिर्जना निङ्लेखु समेतको यो फिल्ममा अभिनय रहेको छ ।

@parikalanewsofficial

बाँसुरी फिल्म्स र कबड्डी फिल्म्सको संयुक्त प्रस्तुति रहेको ‘जारी-२’लाई यो वर्षको व्यापारिक सम्भावना बोकेको फिल्म मानिएको छ । यसको पहिलो भाग ‘जारी’ २०८० सालमा ब्लकबस्टर सावित हुँदै १७ करोडभन्दा बढी बक्स अफिस कमाई गरेको थियो, जसका कारण यस सिक्वेललाई दर्शकले उच्च प्रतीक्षा गरिरहेका छन् ।