सम्झनामा श्रीकृष्ण श्रेष्ठ, निधन भएको आज ११ वर्ष पूरा

इटहरी/ अभिनेता श्रीकृष्ण श्रेष्ठको निधन भएको आज ठीक ११ वर्ष पूरा भएको छ । २०७१ साल साउन २५ गते उनले सारा नेपालीलाई रुवाएर संसार छाडेका थिए । लोकप्रिय सँगै कुशल, मिलनसार अनि हँसिला अभिनेता श्रेष्ठको ‘कोहिनुर’ फिल्म हलमा प्रदर्शन हुँदैगर्दा निधन भएको थियो । यता उनको श्वेता खड्का सँग विवाह भएको १ महिनामै श्रीमती खड्काको सिन्दुर पुछिएको थियो । एकातिर फिल्म हलमा भव्यताका साथ फिल्म चलिरहनु, त्यसका अभिनेता हस्पिटलको शैयामा जीवनसँग हार खानु अनि यता विवाह भएको १ महिनामै एक नारीको सिन्दुर पुछिनुले सारा नेपाल स्तब्ध भएको थियो ।

त्यो दिनको सम्झना सायदै सबै नेपालीलाई अझै सम्झना छ । श्रीकृष्णको पार्थिव शरीरले राष्ट्रिय सम्मान त पायो, तर श्वासले शरीर छोडिसकेपछिको सम्मान सायदै उनले महसुस गरेनन् । न त उनले कोहिनुर चलिरहदा उनको सुखका दर्शक देख्न पाए नत मृत्यु पश्चात उनका पछि मलामी बन्ने हजारौं शुभचिन्तक देख्न पाए । आज त्यो दिन झल्झली प्रायः नेपालीको मानसपटलमा पक्कै छ । विसं २०४५ सालदेखि अभिनय यात्रा सुरू गरेका श्रेष्ठले ‘भूमरी’ फिल्मबाट नेपाली फिल्म उद्योगमा प्रवेश गरेका थिए भने ‘नाता’ फिल्मबाट अभिनेताको रूपमा अभिनय यात्रा अघि बढाएका थिए ।

@parikalanewsofficial

उनको जीवनको अन्तिम फिल्म कोहिनुर बन्यो । उनी दिवङ्गत भएको आज ११ वर्ष पूरा भएको सम्झनामा कोहिनुरका लेखक तथा निर्देशक आकाश अधिकारी भावुक बने । उनलाई स्मरण गर्दै अमर अभिनेताको रुपमा चित्रण गरेका छन् । उनी भन्छन् ‘जतिनै योगदान दिए पनि, त्याग गरे पनि, असल व्यक्तित्व भए पनि, छोडेर गएपछि सबैले बिस्तारै भुल्ने नै रहेछ,’ । उनका अनुसार, करोडौं जनताको मन जित्न सफल श्रीकृष्ण सधैं स्मरणीय रहिरहने छन् ।

उनले आफूसँग श्रीकृष्णले बोलेको अन्तिम शब्द अझै याद रहेको उल्लेख गरे, ‘हाम्रो चलचित्र कोहीनूरको सफलता हेर्न म अबस्य आउँछु।’ म पर्खिरहेँ।’ तर, ती शब्दहरू पनि श्रीकृष्ण श्रेष्ठसँगै सदाका लागि सम्झना मात्रै रहयो । कोहिनुरले बक्स अफिस रेकर्ड तोड्न सफल भएको खुशी सँगै बसेर बाँड्ने अवसर नजुरेकोमा अधिकारीले दुःख व्यक्त गरे । आज श्रीकृष्ण श्रेष्ठको संजोगवश यस वर्ष यही दिन, गते र तारिख मिलेको भन्दै अधिकारीले भावपूर्ण श्रद्धाञ्जली अर्पण गरेका छन् ।