आज विर्तामोड, दमक र इटहरीका हलमा ‘मोहर’का दर्शक भेट्दै पल शाह

इटहरी/ कोशी प्रदेशका विभिन्न प्रमुख शहरका दर्शक भेट्न अभिनेता पल शाह पूर्व आएका छन् । फिल्म हलमा प्रदर्शन भइरहेको ‘मोहर’का दर्शक प्रत्यक्ष भेट्ने यात्रा उनले बिर्तामोडबाट सुरु गरेका छन् । आज आइतबार उनले विर्तामोडको क्विएफएक्स र पाथीभरा सिने प्लाजामा यतिबेला दर्शक भेटिएका छन् । त्यसपछि उनी दमकको डिम्याक्स हल हुँदै साँझ ४ बजे इटहरीको इलाइट सिनेमा हलमा आइपुग्ने कार्यक्रम तय भएको फिल्म युनिटले जनाएको छ ।

यही शुक्रबारबाट प्रदर्शनमा आएको ‘मोहर’ले दुई दिनमै सुखद व्यापार गरेको छ । शुक्रबार ठीकठाक व्यापार गरे पनि शनिबार बिहान औसत देखिएका शोहरू मध्यान्हपछिबाट काठमाडौंसहित मोफसलका हलमा उल्लेख्य रूपमा भरिन थाले । नेपालगञ्जमा त हलहरुले हिन्दी फिल्मको शो कटौती गरेर ‘मोहर’का अतिरिक्त शो थपेका थिए । पोखरा, बुटवल, चितवन लगायतका शहरमा समेत फिल्मको व्यापार उत्साहजनक छ ।

शनिबार दिनभर निर्देशक ओम प्रतिक, नायक पल शाह, नायिकाद्धय बेनिशा हमाल र नीति शाह काठमाडौंका विभिन्न हलमा पुगेका थिए । अष्टनारायण हलमा दर्शकको बाक्लो उपस्थिति देखिएको थियो । कलाकारहरूले दर्शकलाई अभिवादन गर्दै धन्यवाद दिएका थिए भने बेनिशा र नीतिले उच्च साथ र सकारात्मक वर्ड अफ माउथले आफूहरू उत्साहित भएको बताए ।

@parikalanewsofficial

आज पनि काठमाडौं र मोफसलका हलमा उच्च अकुपेन्सीसहित ‘मोहर’को प्रदर्शन भैरहेको छ । वितरक करण श्रेष्ठका अनुसार फिल्मले केही महिनादेखिको नेपाली फिल्मको व्यापारिक खडेरी तोड्ने संकेत दिएको छ । फिल्म मेकर्स प्रा.लि.को ब्यानरमा निर्माण र चुम्बन जंग शाहीको लगानीमा बनेको ‘मोहर’ले दुई दिनमै ७० देखि ८० लाख रुपैयाँसम्मको ग्रस कलेक्सन गरेको अनुमान छ । बलियो वर्ड अफ माउथका कारण आगामी दिनमा पनि फिल्मले दर्शकको साथ पाउने निर्माणपक्षको विश्वास छ ।