कविता वाचन गर्दै ‘कोशेढुङ्गा’ अभिनेत्री सुरक्षा, फिल्मको ३ पोष्टर सार्वजनिक

इटहरी/ आउँदो भदौ १२ गतेदेखि नेपालसहित ४२ भन्दा बढी देशमा एकसाथ रिलिज हुन लागेको फिल्म ‘कोशेढुङ्गा’ले प्रचार अभियानलाई अझ तीव्र बनाएको छ । निर्देशक सरोज पौडेलको निर्देशनमा बनेको यो बहुप्रतिक्षित फिल्मले हालै कविता वाचनसहितको लिरिकल भिडियो र तीनवटा नयाँ पोस्टर सार्वजनिक गर्दै प्रचारलाई तिब्रता दिएको हो । निर्माण टिमले सार्वजनिक गरेको कविता मुख्य अभिनेत्री सुरक्षा पन्तले वाचन गरेकी छन्, जसमा प्रेम, समर्पण, विछोड, पीडा, सपना र संकल्पको भाव समेटिएको छ ।

लिरिकल भिडियोमा फिल्मका केही दृश्यहरु देखाइएका छन्, जसले पात्रहरूको चरित्र झल्काउँछ र कथाको भाव बोल्छ ।सार्वजनिक तीन पोस्टरमा कलाकारहरू क्यारेक्टर लुक्समा प्रस्तुत भएका छन् । पहिलो पोस्टरमा सुरक्षा पन्त, आर्यन सिक्देल, प्रवीण खतिवडा, मन्जिल कुमार, नीति शाह, ऋचा शर्मा र दिनेश काफ्ले देखिन्छन् । दोस्रोमा प्रवीण खतिवडा, दिनेश काफ्ले र झकेन बिसी छन् भने तेस्रोमा सुरक्षा पन्त भारी बोकेकी देखिन्छिन् र मन्जिल कुमार कसैलाई नियालिरहेका छन् । हेर्नुस् भिडियो ।

यसअघि फिल्मले ‘भंगेरा भगेरी’ र ‘नत्र भने जिन्दगी व्यर्थ छ’ शीर्षकका गीतहरू सार्वजनिक गरिसकेको छ, जसमा पछिल्लो गीत टिकटकमा हिट बनेको छ । नरदेवी फिल्मस र सारंगी फिल्मसको सहकार्यमा बनेको ‘कोशेढुङ्गा’मा सुरक्षा पन्त, आर्यन सिक्देल, ऋचा शर्मा, मन्जिल कुमार, नीति शाह, प्रवीण खतिवडा, सरोज खनाल, विशाल पहाडी, हिउवाला गौतम, दिनेश काफ्ले र लोकमणि सापकोटालगायतको अभिनय छ ।

प्रेविल कँडेल र किशोर अनुराग निर्माता रहेको फिल्मको कार्यकारी निर्माता दिनेश खड्का हुन् । बाबु श्रेष्ठको छायांकन, नहकुल खड्काको सम्पादन र आशिष अविरल, खेम सेन्चुरी तथा रिदम कँडेलको संगीत यो फिल्ममा रहेको छ । ‘कोशेढुङ्गा’लाई अन्तर्राष्ट्रिय बजारमा सेभेन सिज इन्टरनेसनलमार्फत प्याट्रिक सुवेदी र रमेश ढकालले वितरण गर्नेछन् । नेपाली फिल्मको इतिहासमै पहिलो पटक यति धेरै देशमा एकसाथ प्रदर्शन हुने भएकाले ‘कोशेढुङ्गा’ले नेपाली फिल्मलाई अन्तर्राष्ट्रिय स्तरमा नयाँ उचाइ दिने अपेक्षा निर्माण टिमको रहेको छ ।

@parikalanewsofficial