स्व. अभिनेता श्रीकृष्ण श्रेष्ठसँगको ‘कोहिनुर’पछि ठीक ११ वर्षमा बलिउड अभिनेता दीपराज राणा पुनः नेपाली फिल्ममा फर्किने तय भएको छ । यसपटक उनले निर्मात्री तथा निर्देशक नीता ढुङ्गानाको फिल्म ‘सुख दुःख’मा अभिनय गर्ने पक्का भएको हो, जसका लागि हालै दुबैबीच औपचारिक सम्झौता भएको छ । यहीबेला निताले श्रीकृष्ण लाई पनि सम्झिएकी छन् ।
उनले सामाजिक सञ्जालमार्फत स्व. श्रीकृष्ण श्रेष्ठको तस्वीर पोस्ट गर्दै “ठ्याक्कै ११ वर्ष भइसकेछ । सम्झनामा सर्वप्रिय अभिनेता श्रीकृष्ण श्रेष्ठ ।” भन्दै लेखेकी छन् । भावनात्मक गहिराई बुझेकी उनले यो क्षणलाई महत्त्वपूर्ण रुपमा लिएको यसले बुझाउँछ । अनुबन्ध भएका राणाले ‘सिंघम रिटर्न्स’, ‘प्रेम रतन धन पायो’, ‘दबङ ३’देखि हालैको ‘मेट्रो इन दिनो’सम्मका बलिउड फिल्ममा आफ्नो दमदार अभिनय देखाइसकेका छन् ।
यस्तै उनले ‘बिल्ली उस्ताद’ र ‘सितारे जमीन पर’मा पनि सम्झनलायक भूमिका निभाइसकेका छन् । कथा मनपरेको कारण ‘सुख दुःख’मा जोडिएको उनले बताउँदै कथा सुनेपछि आफू भावुक भएको अनुभव सुनाए । यसले गर्दा श्रीकृष्ण श्रेष्ठको फिल्म हलमा प्रदर्शन भइरहँदा असमायिक निधन भएपनि आम नेपालीको प्रिय बनेको ‘कोहिनुर’को पुनः सम्झना दिलाउने फिल्म निताले ‘सुख दुःख’ ल्याउन लागेकी त हैन ? भन्ने प्रश्न खडा भएको छ ।
@parikalanewsofficial
सन् २००२ मा बनेको ‘सुख दुःख’मा श्रीकृष्ण पनि प्रमुख अभिनेता थिए । सो बेला उनको अभिनयलाई निकै रुचाईएको थियो । अहिले झण्डै २२ वर्ष पछि सोही नाममा बन्न लागेको ‘सुख दुःख’ले स्व.श्रीकृष्णको यादलाई पुनर्ताजगी बनाउन सक्छ भन्ने कुरामा विश्वास गर्न सकिन्छ । यता त्यो बेला बनेको सुख-दुख’लाई स्व. निर्देशक शिव रेग्मीले निर्देशन गरेका थिए, अहिले निताले उनै रेग्मीलाई समर्पित गर्दै यो फिल्म निर्देशन गर्ने आँट गरेकी छन् । यो उनको डेब्यु निर्देशन हो ।
उक्त फिल्ममा मदनकृष्ण श्रेष्ठ थिए भने अहिले पनि उनी दोहोरिएका छन् । त्यसैले पनि केही विशेष पक्कै बन्दै छ भन्ने आँकलन गर्न सकिन्छ । आगामी फागुनदेखि छायांकन सुरु हुने भनिएको निता ढुङ्गानाको यो ‘सुख दुःख’ फिल्ममा यसअघि नै अभिनयका बादशाहहरु विपना थापा, मिथिला शर्मा र मदनकृष्ण श्रेष्ठ अनुबन्ध भइसकेका छन् । नीता फिल्म्सको ब्यानरमा निर्माण हुने यो फिल्म ‘सुख दुःख’ आउँदो वर्ष २०८३ सालको दशैंको फूलपातीमा प्रदर्शनमा ल्याउने तयारी निर्माण पक्षको रहेको छ ।
Discussion about this post