सिक्लेस गाउँको संस्कृति र प्रेमकथामा बन्ने ‘बुकी फूल’मा दयासँग संस्कृतिको रोमान्स

इटहरी/ कास्कीको पर्यटकीय गाउँ सिक्लेस र कोरी क्षेत्रको सांस्कृतिक र ऐतिहासिक पृष्ठभूमिमा बन्ने नेपाली फिल्म ‘बुकी फूल’मा अभिनेता दयाहाङ राई शीर्ष भूमिकामा देखिँदैछन् । उनीसँगै संस्कृति गुरुङले अनस्क्रिन रोमान्स गर्दै यस फिल्मबाट डेब्यु गर्न लागेकी छन् । साथै, राजेश गुरुङ, प्रेम पुन, लालशोभा गुरुङ, प्रकाश घिमिरे र पुष्कर गुरुङ पनि यो फिल्ममा अनुबन्धित भएका छन् ।

अभियान फिल्म प्रोडक्सनको ब्यानरमा निर्माण हुने यस फिल्मको घोषणा शुक्रबार विज्ञप्तिमार्फत गरिएको हो । बेदबहादुर गुरुङको लेखन र ओमप्रकाश गुरुङको निर्देशनमा बन्ने यो फिल्म पृथक प्रेमकथामा आधारित रहनेछ । फिल्मको कथा सिक्लेस गाउँको माघे संक्रान्तिमा हुने ‘मौदु क्यू फुइ’ चोखो पानीमा स्नान, छेलो फाल्ने प्रतियोगिता र भाद्र पूर्णिमामा दूधपोखरीमा नुहाउने ऐतिहासिक परम्परासँग गाँसिएको छ ।

@parikalanewsofficial

यो फिल्मको छायांकन भदौदेखि माघसम्म हुनेछ र २०८३ सालको बैशाखमा रिलिज गर्ने योजना निर्माण युनिटको रहेको छ । गण्डकी प्रदेश सभा सदस्य तथा जिफानका पूर्वअध्यक्ष बेदबहादुर गुरुङ करिब १० वर्षपछि फिल्म लेखनमा फर्किएका हुन् । मादी गाउँपालिकाका पूर्वअध्यक्ष समेत रहेका उनले लोकेसन हेर्ने काम सकिएको जनाएका छन् ।