साउन २३ देखि प्रदर्शन हुने फिल्म ‘सिटामोल’को ‘रातो पछ्यौरी’ गीत सार्वजनिक

इटहरी/ समाजका जटिल यथार्थलाई व्यङ्ग्य शैलीमा प्रस्तुत गर्ने तयारीमा रहेको नेपाली फिल्म ‘सिटामोल’ले साउन २३ गतेको प्रदर्शन मितिलाई लक्षित गर्दै ‘रातो पछ्यौरी’ बोलको गीत सार्वजनिक गरेको छ । सौगात मल्ल र बेनिशा हमाल मुख्य भूमिकामा रहेको यो फिल्मले मौलिक कथावस्तु र लोकधुनको संयोजनमार्फत दर्शकको मन जित्ने प्रयास गरिरहेको छ । गीतमा अञ्जना खतिवडा र रवि ओडको स्वर सुन्न सकिन्छ भने शब्द, संगीत तथा एरेञ्ज बाबुल गिरीको रहेको छ ।

गीतले नेपाली संस्कृति र परिवेश झल्काउँछ, जसले फिल्मको कथालाई थप जीवन्त बनाएको विश्वास लिइएको छ । यसअघि सार्वजनिक ट्रेलर र पोस्टरले पनि फिल्मप्रति दर्शकको उत्सुकता बढाएको थियो । ट्रेलरमा गरिबी, बेरोजगारी, पारिवारिक द्वन्द्व र राज्यको बेवास्तालाई हाँसो र विडम्बनासहित प्रस्तुत गरिएको छ, जसले सकारात्मक प्रतिक्रियाहरू पाएको छ । हेर्नुस् भिडियो ।

राज बहादुर साने निर्देशित यस फिल्ममा श्रीकृष्ण निरौला, जानुका विश्वकर्मा, लोकेन्द्र लेखक, भुगोल कार्की, हिउँवाला गौतम, सुशील पोखरेल, दिनेश रेग्मी, आरआर खड्का, ज्ञानु मल्ल, पवन भट्टराई, काजल भुजेल र बालकलाकार करण नेपाली, आराध्या राज्यलक्ष्मी डिसीको पनि अभिनय रहेको छ । श्रीकृष्ण र जानुकाले यही फिल्मबाट डेब्यु गरेका हुन् ।

तुल्सी देवी फिल्म प्राली र जुनतारा फिल्म्सको सहकार्यमा बनेको फिल्मको कथा निर्देशक साने र प्रदीप भण्डारीले तयार पारेका हुन् । सिमोस सुनुवारको प्रस्तुति रहेको फिल्मका निर्माता भुगोल कुमार कार्की र विकास राज जोशी हुन् । कार्यकारी निर्माता अप्सरा नेपाली, अजय मल्ल र कुमार केसी छन् भने गंगाराम श्रेष्ठ सह-निर्मातामा छन् ।

@parikalanewsofficial

‘सिटामोल’मा बाबुल गिरीको संगीत, कविराज गहतराजको कोरियोग्राफी, बन्दे प्रसादको सम्पादन, राजेन्द्र मोक्तानको डिआई, मुकेश शाहको साउण्ड डिजाइन, देव महर्जन र शंकर महर्जनको द्वन्द्व निर्देशन, राकेश दाहालको पोस्टर डिजाइन र दिव्य सुवेदीको छायांकन रहेको छ ।