एक महिनाको विश्राममा सौगात, ‘जहाजैमा’ छाडेर ‘परालको आगो’ किन रोजे ?

इटहरी/ नेपाली फिल्म क्षेत्रका व्यस्त अभिनेता सौगात मल्लले शारीरिक अवस्थाका कारण बहुप्रतीक्षित फिल्म ‘जहाजैमा’ छाडेका छन् । खुट्टाको सर्जरीपछि चिकित्सकीय विश्राममा रहेका उनी अब एक महिनासम्म अभिनयबाट टाढा रहनेछन् । निर्देशक कृषा चौलागाईँको निर्देशनमा भदौबाट छायांकन सुरु गर्न लागिएको ‘जहाजैमा’मा अनुबन्धित भए पनि, तयारी गर्न समय नपुग्ने भएपछि सौगातले आफूलाई फिल्मबाट अलग गरेका हुन् ।

तर, उनले भर्खरै “परालको आगो” फिल्म साइन गरेका छन् । उनी सो फिल्मबाट जितु नेपाल अलग्गिए पछि अनुबन्ध भएका हुन् । जहाजैमा फिल्ममा एक्सनको दृश्य रहेको र परालको आगोमा एक्सनको दृश्य नरहेको कारण एकबाट अलग्गिएर अर्कोमा उनी अनुबन्ध भएका हुन् । उनको भर्खरै खुट्टाको सर्जरी गरिएको छ । त्यसैले पनि एक्सन दृश्य समावेश भएको फिल्म उनले तयारी गर्न समय अपुग भएपछि सल्लाहमै छाडेका हुन् ।

@parikalanewsofficial

अहिले उनी सार्वजनिक फिल्म ‘सिटामोल’को प्रचारमा व्यस्त छन् । प्रचार सकिएपछि उनी एक महिना पूरै विश्राम गरेर ‘परालको आगो’मा काम सुरु गर्नेछन् । सौगातको स्टारडम यतिबेला चरममा छ । उनीसँग हाल आधा दर्जनभन्दा बढी फिल्मको लाइनअप छ भने, रिलिजको पर्खाइमा रहेका फिल्मको संख्या पनि उल्लेख्य छ । ‘जार’ र ‘जन्ते बाख्रो’ जस्ता फिल्म यसअघि नै रिलिज भइसकेका छन्, भने यसै वर्ष उनको कम्तीमा सात फिल्म रिलिज हुने अनुमान छ ।