‘मोहर’ प्रचार गर्दै पल शाह, चितवनमा नाच्दै गाउँदै पोखरातिर मोडियो यात्रा

इटहरी/ समाजमा जरो गाडेर बसेको देउकी प्रथामाथि केन्द्रित फिल्म ‘मोहर’ यही साउन २३ गते शुक्रबार देशभर प्रदर्शनमा आउँदैछ । रिलिज मिति नजिकिँदै जाँदा फिल्मका मुख्य नायक पल शाह देश दौडाहामा निस्किएका छन् । प्रचार अभियानको थालनी गर्दै उनी चितवन पुगे, जहाँ उनले दर्शकसँग साक्षात्कार मात्र होइन, गीतमा साथ दिँदै नृत्यसमेत गरे ।

चितवनको म्याङ्गो हल र पर्सामा आयोजना गरिएका कार्यक्रममा शाहले फिल्मका गीतहरूमा दर्शकहरूसँग रमाइलो गरे । गायक थानेश्वर गौतमको साथमा उनी स्टेजमा उत्रिएर ‘मोहर’ हेर्न चितवनबासीलाई आग्रह गरे । दर्शकहरूले पनि ट्रेलर र गीतसंगीतले आफूलाई प्रभावित पारेको भन्दै फिल्मप्रति उत्साह व्यक्त गरे । कार्यक्रममा ‘मोहर’ को सफलताको कामना गर्दै पलले दर्शकहरूसँग केकसमेत काटे ।

अब यो प्रचार यात्रा पोखरा तर्फ मोडिएको छ । पोखरामा आयोजना हुने कार्यक्रममा पनि पल शाह दर्शकहरूसँग प्रत्यक्ष भेटघाट गर्दै, फिल्मका गीतमा प्रस्तुति दिनेछन् । ओम प्रतिकको लेखन तथा निर्देशनमा बनेको यो फिल्म फिल्म मेकर्स प्रा.लि. को ब्यानरमा चुम्बन जंग शाहीले निर्माण गरेका हुन् ।

@parikalanewsofficial

फिल्ममा पल शाहसँगै नीति शाह, बेनिशा हमाल, अर्जुन जंग शाही, लक्ष्मी गिरी, सारा शर्मा, रवीन्द्र झा लगायत कलाकारहरूको अभिनय छ । सेन्सर बोर्डले ‘पीजी सर्टिफिकेट’ दिएको यो फिल्म हेर्न १६ वर्ष मुनीका बालबालिकालाई अभिभावकको साथ अनिवार्य छ । गीत, ट्रेलर र संवादद्वारा सामाजिक यथार्थ प्रस्तुत गर्न सफल भएको ‘मोहर’ ले बक्स अफिसमा राम्रो ओपनिङ गर्ने अपेक्षा गरिएको छ ।