‘खुस्मा’को सफलतापछि ‘जलाकी’, धीरज र उपासनालाई फिचर्ड गर्दै २ पोष्टर सार्वजनिक

इटहरी/ गतवर्ष फिल्म ‘खुस्मा’को सर्वाधिक लोकप्रिय ‘रुकुम मैकोट’ गीतले युट्युबमा ऐतिहासिक सफलता पाएको थियो । सो गीतले पाँच महिनामै १० करोड भ्युज पार गर्यो । फिल्मले पनि सोहीअनुरूप व्यापारिक सफलता हासिल गर्यो । यतिबेला सोही खुस्मा फिल्मका निर्देशक अशोक थापामगर नयाँ फिल्म ‘जलाकी’को तयारीमा जुटिरहेका छन् । ‘खुस्मा’को सुपरहिट यात्रापछि उनीले फेरि पनि मगर र गुरुङ समुदायको संस्कृति र प्रेम भावनालाई केन्द्रमा राख्दै ‘जलाकी’ निर्देशन गरिरहेका छन् ।

यस फिल्मको पहिलो चरणको छायांकन चैत्रमा सम्पन्न भइसकेको छ भने दोस्रो चरणको छायांकन असोज २१ गतेदेखि सुरु हुने तयारीमा छ । ‘खुस्मा’मार्फत उत्कृष्ट अभिनेत्रीको राष्ट्रिय चलचित्र पुरस्कार जितेकी उपासना सिंह ठकुरी फेरि पनि मुख्य भूमिकामा देखिन लागेकी हुन् । यसपटक उनी अभिनेता धिरज मगर र सोनम तोप्देनसँग स्क्रिन सेयर गर्दैछिन् । ‘खुस्मा’मा पनि उपासना र धिरजको जोडी दर्शकले रुचाएका थिए, त्यसैले ‘जलाकी’मा उनीहरूको पुनर्मिलनप्रति दर्शकको चासो थपिएको छ ।

हालै निर्माण टिमले सार्वजनिक गरेको दुई पोस्टरमार्फत फिल्मका मुख्य कलाकार धिरज र उपासनालाई प्रस्तुत गरिएको छ । ट्राइडेन्ट कन्सेप्टका रोयल भिमसेनले डिजाइन गरेको पोस्टरले कथाको भावलाई कलात्मक रूपमा उजागर गरेको छ । साथै, यस फिल्ममार्फत मिस सिक्किम साहारा हाङमा लिम्बुले नेपाली फिल्म क्षेत्रमा अभिनेत्रीको रुपमा डेब्यु गर्दैछिन् ।

‘जलाकी’ एक त्रिकोणात्मक प्रेमकथा हो, जसमा शिल्पा मस्के, माओत्से गुरुङ, बुद्धि तामाङ, अस्तित्व भट्टचन, संगीता थापा मगर, राजु रेग्मी मगर, खड्क बहादुर पुन (खबपु) जस्ता कलाकारहरूको अभिनय रहनेछ । अन्य केही कलाकारहरूको छनोट प्रक्रिया जारी रहेको निर्माण टिमले जनाएको छ । ‘जलाकी’ मगर समुदायमा आस्था र सम्झनाको प्रतीकको रूपमा चिनिने ढुङ्गालाई जनाउने शब्द हो ।

यस फिल्मले मगर र गुरुङ समुदायको जीवनशैली, संस्कृति, भावना र पहिचानलाई समेट्ने लक्ष्य लिएको छ । छायांकन रुकुम, रोल्पा, म्याग्दी, बाग्लुङ, पोखरा तथा दक्षिण कोरियाका विभिन्न स्थानमा गरिनेछ । एम मिडिया प्रालीको ब्यानरमा निर्माण हुने यो फिल्मका निर्माता ओम घर्ति मगर, बिर बहादुर लामा, चन्द्र बहादुर भट्टचन, बेताने मगर (बबिता राना), मान बहादुर धनाह मगर र सुस्मिता बुढाथोकी रहेका छन् । फिल्मको डिओपीमा शैलेन्द्र डी कार्की, लाइन प्रोड्युसरमा राजु रेग्मी मगर, सहायक निर्देशकमा महेश बराल, संगीतकार एसडी योगी र सरित राई तथा गीतकार सुरेन्द्र राना र राम अविरल विष्ट रहनेछन् ।