‘जनै हराएको मान्छे’बाट मिरुनाको अर्को ह्याट्रिकको सम्भावना

इटहरी/ नेपाली फिल्ममा अभिनेत्री मिरुना मगर अब भाग्यमानी नायिकामात्र होइन, व्यावसायिक सफलताको निरन्तरता दिने नाम पनि बन्न थालेकी छन् । एकपछि अर्को गर्दै हिट फिल्म दिइरहेकी मिरुनाले ‘कबड्डी ४’, ‘जारी’ र ‘नाङ्गो गाउँ’बाट पहिलो ह्याट्रिक बनाएकी थिइन् । त्यसपछि ‘रङ्गेली’ र ‘मनसरा’ जस्ता अलि मध्यम प्रतिक्रिया पाएका फिल्महरूमार्फत केही ब्रेक भए पनि ‘घरज्वाइँ’ र ‘ऊनको स्वीटर’ले फेरि सफलताको बाटो समाते ।

अब, मिरुना अभिनीत नयाँ फिल्म ‘जनै हराएको मान्छे: सम्बन्धका धागाहरू’ भदौ ६ गतेबाट प्रदर्शनमा आउँदैछ । यदि यसले पनि हिटको यात्रालाई निरन्तरता दिन सक्यो भने, मिरुनाको करियरमा दोस्रो पटक हिटको ह्याट्रिक बन्नेछ । मिरुना यो फिल्मप्रति आशावादी छन् । उनी भन्छिन्, “जुन-जुन फिल्ममा काम गर्दा राम्रो भाइब्स आउँथ्यो, ती फिल्म सफल भएका छन् । ‘जनै हराएको मान्छे’ गर्दा पनि त्यही ऊर्जा महसुस भएको छ । दर्शकले मन पराउनुहुन्छ भन्नेमा ढुक्क छु ।”

फिल्ममा मिरुनासँगै विजय बराल, केकी अधिकारी, सुशांक मैनाली, गौरव पहाडी, भोलाराज सापकोटा, तारा शर्मा, भावना खपांगी मगर, रियर राई, रुपेश लामा, सुमन थापालगायतको अभिनय रहेको छ । ‘पूर्णबहादुरको सारंगी’ पछि विजय बरालको यो पहिलो मुख्य भूमिका हो, जसले दर्शकको उत्सुकता झनै बढाएको छ । हिमाल न्यौपानेको निर्देशनमा तयार भएको यस फिल्ममा एसोसिएट निर्देशकको रुपमा ‘प्रेमगीत ३’ का अभिनेता मनिष राउत छन् ।

@parikalanewsofficial

राउतले यसलाई नेपाली समाजको गहिरो कथा भन्दै सबै वर्गले आत्मसात गर्न सक्ने फिल्मको रूपमा व्याख्या गरेका छन् । उनले भने, “कहिले हाम्रो जीवनबाट वस्तु हराउँछ, कहिले सम्बन्ध र कहिले अस्तित्व नै । यही हराएको अनुभवलाई केन्द्रमा राखेर बनाइएको फिल्म हो यो । मिरुना मगरमार्फत त्यो अनुभूति दर्शकसम्म पुर्‍याउने कोशिश गरेका छौं ।” यो फिल्मको कथा, पटकथा, संवाद: भानुभक्त ढकालको हो भने कमल न्यौपाने र विमल न्यौपानेले संयुक्त निर्माण गरेका हुन् ।

फिल्मको कार्यकारी निर्माताहरूमा नारायण तिमिल्सिना, चुडामणि सिवाकोटी, आरके मानन्धर, सिआर बस्नेत, फिलिप डिसी, जेम्स महाराजन रहेका छन् । संगीत थानेश्वर गौतम, अर्जुन पोखरेल, एसडी योगी, प्रसान्त सिवाकोटीको रहेको छ भने फिल्मलाई गोविन्द शाहीको काफिया फिल्म्सले वितरण गर्दैछ । सामाजिक यथार्थ, भावनात्मक गहिराइ र सशक्त कलाकारको समिश्रणले निर्माण भएको ‘जनै हराएको मान्छे: सम्बन्धका धागाहरू’ ले दर्शकमाझ कस्तो प्रभाव छोड्छ भन्ने प्रतीक्षा अब धेरै दिनको छैन । फिल्म सफल भए मिरुना मगरका लागि यो अर्को माइलस्टोन सावित हुनेछ ।