‘क्याप्टेन साब’ फिल्मको लागि तीनकुनेमा तयार गरियो पुरानो काठमाडौं र जीवनशैली

इटहरी/ काठमाडौंको तीनकुनेमा अहिले एउटा फरक दृश्य देखिन्छ-सेता रंगका पुराना घर, सडकमा गुडिरहेका पुराना सवारी साधन, डोको बोकेर व्यापार गरिरहेका नेवार समुदाय, अनि तीन दशकअगाडिको काठमाडौं सम्झाउने पहिरनमा सजिएका पात्रहरू । यो कुनै संग्रहालय होइन, चर्चित निर्देशक दीपेन्द्र के. खनालद्वारा निर्देशित बायोपिक फिल्म ‘क्याप्टेन साब’ को छायांकन सेट हो ।

फिल्मको कथा वि.सं. २०३०-४० सालको काठमाडौंमा आधारित भएकाले निर्देशक खनाल लगायत फिल्म निर्माण युनिटले सो कालखण्डको वातावरण पुनः सिर्जना गरेको हो । उनी भन्छन्, “हामी दर्जनौँ नयाँ पक्की घर बनाउन सक्दैनौँ, तर त्यस समयको भावना दिन सक्ने सेता र पुराना शैलीका घर बनाएका छौँ ।” उनले त्यस कालखण्डको कष्ट्युम र दृश्य-शिल्पमा चिट गरेजस्तो नदेखिने गरी मेहनतपूर्वक काम भएको बताए ।

श्रावण १० गतेदेखि छायांकन सुरु गरिएको यो फिल्मको सुटिङ काठमाडौंसँगै काभ्रे, चितवन र वीरगञ्जसम्म विस्तार हुनेछ । ‘क्याप्टेन साब’ नेपालको पहिलो पाइलटमध्ये एक तथा व्यवसायी र सञ्चार उद्यमी रामेश्वर थापाको जीवनकथामा आधारित बायोपिक हो । फिल्ममा खगेन्द्र लामिछाने, सुरक्षा पन्त र सञ्जोग रसाइली मुख्य भूमिकामा देखिँदैछन् ।

@parikalanewsofficial

पटकथा प्रडक्सन, यार्सा स्टुडियो र रिच इन्टरटेन्मेन्टको संयुक्त प्रस्तुति रहेको फिल्ममा दीपेन्द्र के. खनाल स्वयं निर्माता पनि छन् । उनीसँगै करण श्रेष्ठ र सृष्टिमा खनाल निर्माता रहेका छन् भने सिर्जना नापित कार्यकारी निर्मातामा छन् । फिल्मका छायाँकार कृष्णबहादुर थापा हुन् भने मुख्य सहायक निर्देशक सौगात बस्नेत, पोस्टर तथा पब्लिसिटी डिजाइन ट्राइडेन्ट कन्सेप्टका रोयल भीमसेन, प्रोडक्सन डिजाइर एकी थेक्पा र प्रोडक्सन म्यानेजरमा रोहित राज गौतम र विष्णु बुढाथोकी रहेका छन् ।