एलिना र समीक्षाको स्वरमा प्रकाश सपुतको 'नाइ भनेसी नाइ' सार्वजनिक, रेखा थापाको दमदार एक्सन

इटहरी/ बलात्कारजस्ता जघन्य अपराधविरुद्ध चेतना फैलाउने उद्देश्यले गायक तथा अभिनेता प्रकाश सपुतले नयाँ तीज गीत ‘नाइ भनेसी नाइ’ सार्वजनिक गरेका छन् । ‘गलवन्दी प्रोडक्सन’को ब्यानरमा निर्माण गरिएको यो गीत गतवर्ष सार्वजनिक गरिएको “बदला बरिलै” को दोश्रो भाग हो । सार्वजनिक ‘नाइँ भनेसी नाई’मा अभिनेत्री रेखा थापाको दमदार अभिनय देख्न सकिन्छ । भिडियोमा उनलाई एक शक्तिशाली नारीको रुपमा प्रस्तुत गरिएको छ। अन्याय बिरुद्ध उनि देवी अवतारमा समेत देखिन्छिन् । भिडियोको अन्त्यमा उनको एक्सन समेत देख्न सकिन्छ, उनले एक्लै ४/५ जना युवाहरु संग भिडेकि छन् ।

नेपाल प्रहरीको पछिल्लो तथ्यांक अनुसार विगत पाँच वर्षमा ११,९४९ बलात्कारका घटना दर्ता भएका छन् । अघिल्लो आर्थिक वर्षको तुलनामा यो संख्या ५ प्रतिशतले बढी हो । औसतमा दैनिक ७ जना महिला तथा बालिका बलात्कारको शिकार भइरहेका तथ्यांक सार्वजनिक भएसँगै सपुतको गीत सामाजिक सन्देशसहितको सांगीतिक प्रतिरोधको रूपमा आएको हो । ‘नाइ भनेसी नाइ’ गीतमा बलात्कारपीडितका पीडालाई उजागर गर्दै मौनता तोड्न र अन्यायको चक्र तोड्न आह्वान गरिएको छ । हेर्नुस भिडियो ।

गीतमा प्रकाश सपुतको परिकल्पना र निर्देशन रहेको छ भने रेखा थापासँगै सञ्जोग बराइली, सिमरन खड्का, प्रकाश सपुत स्वयं र बालकलाकार प्रविष्टि सपुतको पनि अभिनय देख्न सकिन्छ । गीतमा स्वर समीक्षा अधिकारी र एलिना चौहानको रहेको छ । यी २ गायिकालाई पनि भिडियोमा गीत गाउदै गरेको अवस्थामा फिचर्ड गरिएको छ । यो गीतमा शब्द र संगीत प्रकाश सपुतकै रहेको छ भने श्यामश्वेत रसाइलीले संगीत संयोजन गरेका छन् । कमल थापाले अडियो सम्पादन र प्रि-मिक्सिङ गरेका हुन् भने गोविन्द अनेक रेकर्डिस्टका रूपमा रहेका छन् । गीतमा पोषण घर्ती मगरको मादल, हेमन्त कान्छा रसाइलीको सारङ्गी र रत्न बि.क.को बाँसुरी प्रयोग गरिएको छ ।

भिडियोको निर्देशक सपुत नै रहेका छन् भने सुनिल बि.क. सहायक निर्देशकका रूपमा छन् । रोशन विश्वकर्मा कोरियोग्राफर, बुद्ध थापा र टिम छायाकार, प्रविण भट्ट सम्पादक, मिलन विश्वकर्मा रंग संयोजन तथा भीएफएक्स र शिव पौडेल द्वन्द्व निर्देशकका रूपमा रहेका छन् । भिडियोको पोष्ट प्रोडक्सन ‘गलवन्दी प्रोडक्सन’ मार्फत नै गरिएको हो । गीतका निर्माता प्रतिष्ठा गौतम र कार्यकारी निर्मातामा मोहन विश्वकर्मा तथा विन्दु बोहोरा रहेका छन् । सामाजिक यथार्थलाई कलात्मक ढंगले प्रस्तुत गर्ने प्रयासस्वरूप आएको यो गीतले बलात्कारजस्ता अपराधका विरुद्ध आवाज उठाउँदै न्यायको मागलाई अझ मजबुत बनाउने जमर्को गरेको छ ।