ईटहरी/ लेकाली सौन्दर्य र खेलकुदको कथालाई समेटेको फिल्म ‘बुकी’को फस्टलुक पोस्टर सार्वजनिक गरिएको छ । मोहन केसीको निर्देशनमा तयार भएको यस फिल्मले आज शनिबार आफ्नो पहिलो झलक दर्शकमाझ ल्याएको हो । हिमालयन म्युजिकल इभेन्ट म्यानेजमेन्ट एन्ड फिल्मसको प्रस्तुति रहेको फिल्मको पोस्टरले नै यसको विषयवस्तुको झल्को दिएको छ ।
पोस्टरमा बुकी फूल फूलेको देखिन्छ-हिमाली भूगोलको चौरमा कुहिरोको सान्निध्यसँगै, जहाँ एक पुरुषसहित सात महिला भलिबल खेलिरहेका छन् । नेट र कोर्टसमेत देखिएको दृश्यले महिलाहरू कुनै प्रतियोगिताका लागि अभ्यासमा लागेका जस्तो आभास दिन्छ । यद्यपि, निर्माण पक्षले यो कुरामा अझ प्रष्ट जानकारी भने दिएको छैन ।
‘बुकी फूल’ वर्षा याममा हिमाली पाटनमा फुल्ने फूल हो । त्यही ‘बुकी’ फूलको नाम बोकेको फिल्मले हिमाली भूगोल, खेलकुद र प्रकृतिबीचको सम्बन्धको कथा भन्न खोजेको छ । फिल्ममा सुरक्षा पन्त, देबेन्द्र बब्लु, रोशनी कार्की, प्रकाश घिमिरे, लक्ष्मीनाथ तिमलसिना, गानु जोशी, अनु दाहाल, सन्दिप बाबु लोहनी, निशा बजगाईं लगायतको अभिनय रहनेछ ।
@parikalanewsofficial
कार्यकारी निर्मातामा प्रकाश आले र राजन केसी छन् भने निर्माता टोलीमा लक्ष्मण सापकोटा, अमिशा काउचा थापा, रमेश थापा लगायत छन् । फिल्मको क्रिएटिभ प्रोडुसर राजेश थापा र बसुन्धरा खरेल हुन् । छायांकनमा विकास गन्दर्भ, सम्पादनमा भूपेन्द्र अधिकारी, र संगीतमा दीपक शर्मा र एचबीएन किस्मत छन् । प्रचार डिजाइन राकेश दाहालले सम्हाल्ने छन् । काठमाडाैं, पोखरा र बागलुङको ढोरपाटन क्षेत्रहरूमा छायांकन गरिएको यो फिल्म २०२६ भित्र प्रदर्शनमा ल्याउने तयारीमा निर्माण पक्ष जुटेको छ ।
Discussion about this post