‘मोहर’ गीत: पल शाह, नीति शाह र बेनिशा हमालको चरित्रभित्रको पीडा उजागर

इटहरी/ नेपाली फिल्म ‘मोहर’ले रिलिज नजिकिँदै गर्दा भावनात्मक रूपमा दर्शकलाई झनै नजिक ल्याउने नयाँ वियोगान्त गीत ‘सपना हो कि विपना हो कि जिन्दगी’ सार्वजनिक गरेको छ । गायक थानेश्वर गौतम र गायिका शान्ती श्री परियारको स्वरमा सजिएको यो गीतले फिल्मका मुख्य पात्रहरू भित्रको वेदना र विछोडको कथा बोल्छ । गीतमा प्रभा बर्तौलाको गहिरा शब्द र थानेश्वर गौतमकै संगीत रहेको छ ।

मार्मिक शब्द र सुरको संयोजनले गीतलाई अझ प्रभावशाली बनाएको छ । पल शाह, नीति शाह र बेनिशा हमालले निर्वाह गरेका चरित्रहरूको अन्तर्मनको पीडा यो गीतमार्फत प्रस्ट देखिन्छ । ओम प्रतिकको लेखन तथा निर्देशनमा तयार भएको फिल्म ‘मोहर’ चुम्बन जंग शाहीको निर्माणमा फिल्म मेकर्स प्रा.लिको ब्यानरमा बनेको हो । फिल्ममा पल शाह, अर्जुन जंग शाही, बेनिशा हमाल, नीति शाह, मिथिला शर्मा, रविन्द्र झा, लक्ष्मी गिरी, सुशील देवकोटा, सारा शर्मा (बाल कलाकार) लगायतको प्रमुख भूमिका रहेको छ । हेर्नुस् भिडियो ।

फिल्मको छायांकन दीपेन बस्न्यातले गरेका हुन् भने सम्पादन भूपेन्द्र अधिकारीले गरेका छन् । सुरेश अधिकारी, थानेश्वर गौतम र एसडी योगीको संगीत, समीर मियाको भीएफएक्स, कुमार महर्जनको एक्सन, रामजी लामिछाने र कविराज गहतराजको कोरियोग्राफी तथा गिरिराज घिमिरेको मुख्य सहायक निर्देशन रहेको फिल्म साउन २३ गतेबाट रिलिजमा आउँदैछ । यसअघि सार्वजनिक ट्रेलर र गीतहरूले पनि दर्शकको ध्यान तानेको छ, जसले फिल्मप्रतिको उत्साह अझ बढाएको छ ।