इटहरी/ विवाह संस्कारमा महिलाले गाउने परम्परागत लोकगीत ‘रत्यौली’ अब ठूलो पर्दामा जीवन्त बन्ने भएको छ । नेपाली मौलिकता, परम्परा र संस्कृतिमा आधारित नयाँ फिल्म ‘रत्यौली’को निर्माण औपचारिक रूपमा घोषणा गरिएको छ । सांस्कृतिक चेतना, पारिवारिक भावना र नेपालीपनको समिश्रणमा बन्ने यो फिल्मले परम्परागत गीत–संस्कारलाई आधुनिक दृश्यमा प्रस्तुत गर्ने तयारी गरेको छ ।
फिल्ममार्फत रन्जन रिजालले निर्माता रूपमा डेब्यु गर्दैछन् । सन् २०६२/६३ सालदेखि म्युजिक भिडियो क्षेत्रमा मोडलका रूपमा सक्रिय रहेका रिजालले सयौं भिडियोमा अभिनय गर्दै आफ्नो छुट्टै पहिचान बनाएका छन् । अब उनले ठूलो पर्दामा मौलिक विषयवस्तु प्रस्तुत गर्ने लक्ष्य लिएका छन् । ‘नाइ नभन्नु ल ३’ र ‘समभर लभ’ जस्ता सफल फिल्मका निर्देशक मुस्कान ढकालले निर्देशन गर्ने ‘रत्यौली’ नाइट एंगल इन्टरटेनमेन्टको ब्यानरमा निर्माण हुनेछ ।
फिल्ममा नोयन्द्र धिताल, विजय कुमार पाठक र ढकाल स्वयंको संयुक्त लगानी रहनेछ । हाल कलाकार छनोट र प्राविधिक तयारीका कामहरू अघि बढिरहेका छन् । फिल्मको छायांकन तिहारपछि सुरु गरिने जानकारी दिइएको छ । प्रस्तुतकर्ता रन्जन रिजाल भन्छन्, “नेपाली दर्शकहरू मौलिक कथावस्तुमा बनेका फिल्मप्रति विशेष रुचि राख्छन्, त्यसैले हामीले ‘रत्यौली’लाई पनि त्यसै अनुसारको प्रस्तुति बनाउन लागेका हौं।” निर्देशक ढकालका अनुसार फिल्मले नेपाली संस्कृति र मनोरञ्जनबीच सन्तुलन राख्नेछ ।
@parikalanewsofficial
Discussion about this post