निताको डेब्यु निर्देशकीय फिल्म ‘सुखदुःख’मा मिथिलापछि मदनकृष्ण श्रेषठको इन्ट्री

इटहरी/ स्वर्गीय निर्देशक शिव रेग्मीको कालजयी फिल्म ‘सुख–दुःख’को नाम पुनःप्रयोग गर्दै अभिनेत्री नीता ढुङ्गाना निर्देशनमा डेब्यु गर्दैछिन् । रेग्मीको स्मृतिमा समर्पित यस फिल्ममा बरिष्ठ कलाकारहरूको उपस्थितिले निर्माण सुरु हुनुअघि नै चर्चा पाएको छ । केही दिनअघि मात्र वरिष्ठ अभिनेत्री मिथिला शर्मालाई अनुबन्ध गरिएकोमा, हालै वरिष्ठ कलाकार मदन कृष्ण श्रेष्ठ पनि फिल्ममा आबद्ध भएका छन् ।

निर्देशक निताले शुक्रबार श्रेष्ठसँग कागजी सम्झौता गरेकी हुन् ।
फिल्म ‘सुख–दुःख’ नीता ढुङ्गानाको डेब्यु निर्देशन मात्र होइन, नेपाली फिल्म क्षेत्रका सशक्त कलाकारहरूको पुनर्मिलन पनि हो भन्दा फरक नपर्ला । अभिनेत्री तथा निर्मात्रीको रूपमा जिम्मेवारी सम्हालिरहेकी नीताले फिल्मलाई दिवंगत निर्देशक शिव रेग्मीको स्मृतिमा श्रद्धाञ्जली स्वरूप बनाउने घोषणा गरेकी छन् ।

केहीअघि उनले सामाजिक सञ्जालमा लेखेकी थिइन्, “शिव रेग्मी सरको कालजयी फिल्म ‘सुख–दुःख’ को नाम पुनःप्रयोग गर्न पाउनु गौरवको विषय हो। श्रीमती ज्ञानु रेग्मी ज्यूको अनुमति र आशीर्वाद पाउनु मेरो लागि सौभाग्य हो।” यो फिल्मको प्राविधिक पक्षमा पनि विशेष ध्यान दिइएको छ । यसका लागि चर्चित भारतीय छायाँकार कवीरलाल र शाहिदलाल डिओपीमा अनुबन्ध भइसकेका छन् । निर्माण व्यवस्थापनको जिम्मा शंकर पाण्डेलाई दिइएको छ भने ‘नीता फिल्म्स’को ब्यानरमा फिल्म तयार हुँदैछ ।

@parikalanewsofficial

आगामी वर्षको दशैंको फूलपातीमा फिल्मलाई प्रदर्शनमा ल्याउने तयारी भइरहेको छ । फिल्मको वितरण अधिकार उपत्यका बाहिरका लागि एफडी कम्पनीले लिएको छ भने उपत्यकाभित्रको वितरण रिच इन्टरटेनमेन्टले गर्नेछ । बरिष्ठ कलाकारहरूको सहभागिता, भारतीय छायाँकारहरूको संलग्नता र शिव रेग्मीप्रतिको सम्मानसँगै फिल्म ‘सुखदुःख’ दर्शकहरूका लागि विशेष प्रतिक्षाको विषय बनेको छ ।