सिर्जनाको जन्मदिनमा मिरमिरे रिलिज लक, माघ १ देखि प्रदर्शनमा आउने पक्का

इटहरी/ अभिनेता दयाहाङ राई र गायक तथा अभिनेता प्रकाश सपूतको पहिलो पटकको सहकार्य रहेको फिल्म ‘मिरमिरे’ आगामी माघ १ गतेदेखि देशव्यापी प्रदर्शनमा आउने भएको छ । यम शेर्पाको निर्देशनमा तयार भइरहेको यो फिल्मको रिलिज मिति नायिका सिर्जना निङलेखुको जन्मदिनको अवसर पारेर घोषणा गरिएको हो । छायांकनकै सेटबाट निर्माणपक्षले प्रदर्शन मिति सार्वजनिक गरेको हो ।

निर्देशक यम शेर्पाले वितरक र प्रदर्शकहरूसँगको सल्लाहपछि माघ १ लाई उपयुक्त मितिका रूपमा रोजिएको बताए । अहिले फिल्मको छायांकन चित्लाङ, मकवानपुरमा जारी रहेको छ भने केही दृश्य काभ्रेपलाञ्चोकमा छायांकन भइसकेका छन् । असार २१ गतेदेखि सुरु भएको सुटिङ आगामी दुई साताभित्र सम्पन्न हुने निर्माण टिमले जनाएको छ । यार्सा फिल्म्सको प्रस्तुति रहेको यस फिल्ममा दयाहाङ राई, प्रकाश सपूत र सिर्जना निङलेखु मुख्य भूमिकामा छन् ।

अन्य कलाकारमा माओत्से गुरुङ, छुल्ठिम गुरुङ, भोलाराज सापकोटा लगायत छन् । बालकलाकारहरूमा शाइसा गौचन, दिविशा पन्त, चिराग श्रेष्ठ र नमनराज गजुरेल छन् । निर्देशक यम शेर्पाले यसअघि ‘कार्साङ’मार्फत निर्देशन यात्रा सुरु गरेका थिए, जसमा पनि दयाहाङ मुख्य भूमिकामा थिए । यस पटक उनले ‘मिरमिरे’को कथा पनि आफैँले लेखेका छन् । फिल्मका छायाकार आलोक शुक्ला हुन् ।

@parikalanewsofficial

निमु शेर्पा, छोङ्बा लामा शेर्पा र आङ्छिरिङ शेर्पा निर्माता रहेको फिल्ममा गोविन्द बोहरा र सुदिप कुँवर सह-निर्माता छन् । रोहित कट्टेल कार्यकारी निर्माता तथा वितरकको भूमिकामा छन्, जसले रत्न श्रेष्ठसँग मिलेर आरआर फिल्म्समार्फत देशभर वितरणको जिम्मा लिएका छन् । अन्य टिम सदस्यहरूमा बिरेन्द्र शाही लाइन प्रोड्युसर, सुदिप कुँवर मुख्य सहायक निर्देशक, सञ्जु थलाङ लिम्बु मेकअप र दिलीप पन्त निर्माण नियन्त्रक रहेका छन् ।