नाजिर हुसेन अभिनीत ‘गुन्यु चोलो’को ट्रेलर रिलिज, लैंगिक पहिचानको मार्मिक कथा

इटहरी/ तेस्रोलिंगी पात्रको संवेदनशील जीवनयात्रा चित्रण गरिएको प्रतिक्षित नेपाली फिल्म ‘गुन्यु चोलो : द ड्रेस’को ट्रेलर सार्वजनिक भएको छ । समुन्द्र भट्ट निर्देशित यो फिल्मले पारालैंगिक महिलाको भावनात्मक संघर्ष र सामाजिक अस्वीकारसँगको जुधाइलाई गहिरोसँग प्रस्तुत गरेको छ । ट्रेलरमा सानैदेखि महिला पहिरनप्रति आकर्षण राख्ने एक युवकको कथालाई देखाइएको छ, जो आफ्नो लिंगीय पहिचान स्वीकार गर्न खोज्दछ तर बुवाको कठोर सोच र समाजको दबाबसँग जुढ्नुपर्ने बाध्यता आइपर्छ ।

जब बुवाले उसलाई जबरजस्ती लाउरे बनाउन खोज्छन्, उसले आफ्नै बाटो रोज्ने निर्णय गर्छ । ट्रेलरले यही द्वन्द्व, अस्वीकार, अपहेलना र पहिचान खोजीको कथालाई अत्यन्त भावुक ढङ्गले उठाएको छ । नाजिर हुसेनले फिल्ममा ट्रान्सवुमनको मुख्य भूमिका निर्वाह गरेका छन् । साथमा सञ्चिता लुइँटेल, सुशील सिटौला, शिशिर राणा, राजकुमार घोष, अनुपम श्रेष्ठ र विशाल पहारीजस्ता कलाकारहरूको सशक्त अभिनय रहेको छ । हेर्नुस् ट्रेलर ।

फिल्मको सम्पूर्ण पोस्ट-प्रोडक्सन विदेशमा सम्पन्न गरिएको हो । हलिउडको शैलीमा गरिएको सम्पादन, कलर, साउन्ड डिजाइन र ब्याकग्राउन्ड स्कोरमार्फत फिल्मलाई प्राविधिक रूपमा अन्तर्राष्ट्रिय स्तरमा पुर्याउने प्रयास गरिएको छ । विशेष उल्लेखीय पक्षमा, ग्ल्याडिएटर-२ की गायिका लिजा जेरार्डको स्वर र संगीतकार मार्सेलो दी फ्रान्सिसीको संगीतले फिल्मको भावनात्मक गहिराइलाई थप बल दिएको छ ।

@parikalanewsofficial

अमेरिकाको बफेलो एट्लेले यस फिल्मको अन्तर्राष्ट्रिय वितरण अधिकार खरिद गरिसकेको छ भने, अमेरिकाको प्रतिष्ठित तस्वीर फिल्म मार्केटमा समेत यो फिल्म छनोट भइसकेको छ । ‘गुन्यु चोलो : द ड्रेस’ आगामी भदौ १३ गते (अर्थात् २०२५ सेप्टेम्बरको पहिलो हप्ता) देखि देशभर प्रदर्शनमा आउँदैछ । आकाश बुढाथोकी र भि-भन्से जानुबोनको लगानीमा तयार भएको यो फिल्म नेपाली र हलिउड फिल्म प्रोडक्सन हाउसको संयुक्त प्रस्तुति हो । यो फिल्मको कार्यकारी निर्मातामा जेफ्री जे वेन र स्टिभ जोन्स्टन छन् भने सह-निर्मातामा अनुपम श्रेष्ठ रहेका छन् ।