फिल्म ‘रियाल रिङ्गेट’ प्रिमियरमा भावुक दृश्य, यही शुक्रवार देखि प्रदर्शनमा आउँदै

इटहरी/ प्रवासी नेपालीहरूको कथा बोकेको नेपाली फिल्म ‘रियाल रिङ्गेट’ यही शुक्रबार देशभर रिलिज हुँदैछ । रिलिजको पूर्वसन्ध्यामा काठमाडौंमा आयोजना गरिएको यसको भव्य प्रिमियरले दर्शक, कलाकार र समीक्षकहरूमाझ गहिरो प्रभाव छाड्यो । कार्यक्रममा फिल्म युनिटका सदस्यहरू, प्रतिष्ठित कलाकार, सञ्चारकर्मी तथा विभिन्न क्षेत्रका विशिष्ट व्यक्तिहरूको बाक्लो उपस्थिति देखिन्थ्यो ।

निर्देशक विभोर पोखरेल र निर्माता गगनलाल प्रधानको यो प्रस्तुतीले विदेशमा श्रम गरेर गुजारा चलाइरहेका नेपालीहरूको सपना, संघर्ष र पीडालाई पर्दामा उतारेको छ । फिल्मको शीर्षकमै खाडी र मलेसियाली मुद्रा ‘रियाल’ र ‘रिङ्गेट’ राखेर यसको कथावस्तुको गहिरो संकेत गरिएको छ । फिल्म हेरेपछि धेरै दर्शकहरू भावुक देखिए । “यो केवल एउटा चलचित्र होइन, लाखौँ नेपालीहरूको अन्तर्मनको कथा हो,” उपस्थीत दर्शकले भने ।

इराकमा बन्धक बनाई हत्या गरिएका १२ नेपालीको सन्दर्भ फिल्ममा समेटिँदा हलमै आँखा रसाएका दृश्यहरू देखिए । वरिष्ठ कलाकार मदनकृष्ण श्रेष्ठले फिल्मले निकै भावुक बनाएको बताए । त्यसैगरी, गायक प्रेमराजा महतले पनि फिल्मको प्रशंसा गर्दै भने, “धेरैपछि कुनै नेपाली फिल्मले यति प्रभाव छोड्यो । राजनीतिज्ञहरूले यो फिल्म हेर्नैपर्छ, यो देशको यथार्थ बोलेको छ।”

@parikalanewsofficial

फिल्ममा प्रमोद चौलागाईं र निता ढुङ्गाना मुख्य भूमिकामा छन् । साथमा छुल्ठिम डोल्मा गुरुङ, रवीन्द्र खड्का, रियर राई, रामचन्द्र अधिकारी, रोशन श्रेष्ठ लगायतका कलाकारहरूको अभिनय देख्न पाइन्छ । प्रदीप भारद्वाजको लेखनमा रहेको फिल्मको छायाङ्कन भारतको राजस्थान, चितवन, काठमाडौं र लेटाङमा गरिएको हो । द्वन्द्व निर्देशन रोशन श्रेष्ठ, छायाङ्कन हरि घले, सम्पादन विपिन मल्ल, पृष्ठभूमि संगीत किरण तुलाधरले गरेका छन् ।

फिल्मको गीतहरूमा रामचन्द्र काफ्ले, किरण तुलाधर र चन्दन ध्वज केसीको संगीत छ भने, स्वर सुगम पोखरेल, केतन क्षेत्री, रामचन्द्र काफ्ले र जुनु रिजाल काफ्लेले दिएका छन् । ‘रियाल रिङ्गेट’ ले क्युएफएक्स, आइएनआई लगायतका देशभरका ठूला हलहरूमा एक सय हाराहारीमा शो प्राप्त गरेको छ । काफिया फिल्म्सले वितरण गरिरहेको फिल्म रेबेल फिल्मसको ब्यानरमा बनेको हो । फिल्मको अग्रिम टिकट बुकिङ सुरु भइसकेको छ ।