‘अभिमन्यु : च्याप्टर-१’को तेश्रो पोष्टर सार्वजनिक, भदौ २७ मा रिलिज हुँदै

इटहरी/ फिल्म ‘अभिमन्यु : च्याप्टर–१’ ले आफ्नो नयाँ पोस्टर सार्वजनिक गर्दै कथावस्तुमा रहेको भावनात्मक द्वन्द्वलाई दर्शाउने प्रयास गरेको छ । आज सार्वजनिक गरिएको तेस्रो पोस्टरमा कलाकारहरूको अनुहारमा झल्किएको खुसी र तनावले कथा रहस्यमय हुने संकेत गर्छ । पोस्टरमा शीर्ष स्थानमा अभिनेता कामेश्वर चौरसिया छन्, जसको लामो कपाल र दारीसहितको हाउभाउमा आत्मविश्वाससहितको मुस्कान छ ।

उनीसँगै शिशिर वाङदेल, प्रकाश दाहाल, गौमाया गुरुङ, लक्ष्मी बर्देबा र सरिता गिरी पनि पोस्टरमा छन्, जहाँ प्रकाश, गौमाया र लक्ष्मी तनावग्रस्त मुद्रामा प्रस्तुत छन् । पोस्टरमा जिल्ला कारागार मोरङ प्रष्ट देखिन्छ भने अर्को सरकारी कार्यालय धुँवसाटो झल्किएको छ, तर स्पष्ट नदेखिएकाले थप कौतूहल पैदा भएको छ । रङ संयोजन र पात्रको हाउभाउले गंजागोल, चुनौती र मनोवैज्ञानिक तनावलाई संकेत गर्छ – जुन पैसा, सम्बन्ध वा विश्वाससँग जोडिएको हुनसक्ने अनुमान गर्न सकिन्छ ।

यसअघि सोमबार सार्वजनिक भएका दुई पोस्टरमा पनि यस्तै भावनात्मक तनाव झल्किएको थियो । निर्देशक सुशान्त गौतमको डेब्यु निर्देशन रहेको ‘अभिमन्यु : च्याप्टर–१’ भदौ २७ गते नेपाली भाषामा देशभर प्रदर्शन हुँदैछ भने हिन्दी संस्करण असोज ६ गते रिलिज हुनेछ । निर्माता विनोद पौडेलका अनुसार हिन्दी भर्सन पनि वल्र्डवाइड स्क्रिनिङमा लैजाने तयारी गरिएको छ । फिल्मले पैसाको लोभमा परेका पात्रहरू कसरी चक्रव्यूहमा फस्छन् र त्यहाँबाट उम्किन संघर्ष गर्छन् भन्ने कथालाई मूल सन्देश बनाएको छ ।

@parikalanewsofficial

सेभेन सिज सिनेमाको ब्यानरमा बनेको यस फिल्ममा कामेश्वर चौरसिया, सरिता गिरी, गौमाया गुरुङ, लक्ष्मी बर्देबा, शिशिर वाङदेल, किरण श्रेष्ठ, प्रकाश दाहाल र सुष्मा निरौलाको मुख्य भूमिका रहेको छ । लेखन मुकेश खनालको रहेको फिल्मका क्रिएटिभ निर्देशक मदन थापा हुन् भने निर्माता विनोद पौडेल र गुञ्जन गिरी हुन् । सह-निर्मातामा रमेश चौलागाई र हरि श्रेष्ठ तथा कार्यकारी निर्मातामा विशाल लामा, हरि मोक्तान, कृष्ण भट्टराई, नीराजन लुइँटेल र सन्देश श्रेष्ठ रहेका छन् । मनोज श्रेष्ठले भिएफएक्स, सुप्रिम पराजुलीले रंग संयोजन, मदन घिमिरेले सम्पादन र शरद महतोले डिओपीको जिम्मेवारी सम्हालेका छन् । लाइन प्रोड्युसरको रूपमा जीवन शाक्य छन् ।