पाँडेको निर्देशन रहने ‘झरीपछिको इन्द्रेणी’ शुभमुहूर्त, बालेनको र्याप र उप्रेतीको कमब्याक

इटहरी/ साउन १५ खीर खाने दिनलाई विशेष बनाएर अभिनेता तथा हास्यकलाकार अर्जुन घिमिरे ‘पाँडे’ले आफ्नै निर्देशनमा निर्माण हुन लागेको फिल्म ‘झरीपछिको इन्द्रेणी’ को ललितपुरस्थित धन्तेरी बाराही मन्दिरमा शुभमुहूर्त गरेका छन् । लोकप्रिय टेलिभिजन श्रृंखला ‘भद्रगोल’ र ‘सक्किगोनि’ निर्माण तथा निर्देशन गर्दै आएका पाँडे अब फिल्ममा निर्देशकको रुपमा नयाँ भूमिकामा देखिने भएका हुन् । अघिल्लो वर्ष ‘लाज शरणम्’मार्फत फिल्म अभिनयमा देखिएका पाँडेले सो फिल्मको सफलता पछि निर्देशनमा हात हालेका हुन् ।

नयाँ फिल्ममा ‘सक्किगोनि’ टिमबाट प्रियाना आचार्य (मुन्नी) मात्रै सामेल भएकी छन् । अन्य कलाकार कथाको मागअनुसार छनोट हुने निर्देशक घिमिरेले जनाएका छन् । ‘झरीपछिको इन्द्रेणी’ बाट झण्डै ९ वर्षपछि कलाकार गणेश उप्रेतीले नेपाली फिल्म क्षेत्रमा कमब्याक गर्दैछन् । फिल्ममा गणेश र प्रियानासँगै निर्मल शर्मा, रमेश उप्रेती, दीपाश्री निरौला लगायतका कलाकारको अभिनय रहनेछ । अर्जुन घिमिरे स्वयंको अभिनय रहने कि नहुने भन्ने टुंगो लागिसकेको छैन ।

@parikalanewsofficial

कुमार व्यञ्जनकार (कुमार बेन) को कथा तथा अर्जुन घिमिरे र विशाल घिमिरेको पटकथामा आधारित फिल्म पारिवारिक कथावस्तुमा निर्माण हुनेछ । पशुपति शिवजी इन्टरटेन्मेन्टको ब्यानरमा बन्ने फिल्ममा सुशील कडरियाको लगानी, बुद्ध थापाको छायांकन रहनेछ । फिल्मको एक गीतमा रास्वापा नेता गणेश कार्कीको शब्द र काठमाडौं महानगरका मेयर बालेन शाहको र्याप समेत समावेश हुनेछ ।

शुभमुहूर्त कार्यक्रममा बालेनकी पत्नी सविना काफ्लेको उपस्थिति र शुभकामनाले कार्यक्रमलाई थप विशेष बनायो । फिल्मको छायांकन काठमाडौं, ललितपुर र भक्तपुरमा ४५ दिनको सेड्युलमा गरिनेछ । निर्देशन यात्रामा पहिलो पाइला टेकिरहेका अर्जुन घिमिरेले टेलिभिजनमा जस्तै फिल्ममा पनि फरक छाप छोड्ने अपेक्षा गरिएको छ ।