‘झिँगेदाउ २’को गीत रेकर्डिङ सम्पन्न, दशैंतिहारपछि छायांकन सुरू हुने

इटहरी/ फिल्म ‘झिँगेदाउ २’ को निर्माण चरण तीव्र गतिमा अगाडि बढिरहेको छ । बुधबार चर्चित गायिका शान्तिश्री परियार र गायक बसन्त थापाको स्वरमा रहेको ‘आजलाई नाई नभन’ बोलको गीत रेकर्ड गर्दै फिल्म प्रि-प्रोडक्सनको महत्त्वपूर्ण हिस्सा पूरा भएको छ । निर्माता तथा निर्देशक ज्ञानेन्द्र देउजाको निर्देशन रहने यो सिक्वेल फिल्मको संगीतमा अर्जुन पोखरेलले शब्द, संगीत र एरेञ्ज सम्हालेका छन् ।

पोखरेल र थापाको यो पहिलो सहकार्य हो भने थापाले ‘छ माया छपक्कै’ पछि दोस्रोपटक नेपाली फिल्मको गीतमा स्वर दिएका हुन् । ‘झिँगेदाउ’ को हिट गीत ‘आगो बिना बिँडी जल्दैन’ मा सँगै काम गरेका परियार, पोखरेल र देउजा योपटक पनि टोली दोहोर्याएका छन् । निर्देशक देउजाका अनुसार शान्तिश्री परियारलाई यसपटक पनि ‘लक्की चार्म’ मान्दै पुनः सहकार्य गरिएको हो ।

अबको १० दिनभित्र गीत तथा सम्पूर्ण प्रि-प्रोडक्सनको काम सकिने र दशैं–तिहार लगत्तै छायांकनमा जाने तयारी निर्माण टिमले जनाएको छ । ‘झिँगेदाउ २’ को कथा पहिलो भाग जहाँ अन्त्य भएको थियो, त्यहीँबाट सुरु हुनेछ । निर्देशक देउजाका अनुसार यो फिल्म पूर्ण रूपमा सिक्वेल हुनेछ । फिल्ममा केकी अधिकारी, आँचल शर्मा, मुकुन भुषाल र कुशल बिष्टसहित पहिलो भागका अधिकांश कलाकार दोहोरिने छन् ।

@parikalanewsofficial

साथै एक नयाँ अभिनेता र एक नयाँ अभिनेत्रीको पनि प्रवेश हुने जानकारी दिइएको छ । कपनगढी सिनेमा प्रालिको ब्यानरमा बन्ने फिल्मका निर्माता शुलभ प्रतिक देउजा र समीक्षा देउजा हुन् । ईश्वर घिमिरे प्रोडक्सन हेड रहने फिल्ममा बिष्णु कल्पितको छायांकन, अर्जुन पोखरेलको संगीत, रोशन श्रेष्ठको द्वन्द्व निर्देशन र मित्र डि. गुरुङको सम्पादन रहनेछ ।