निरन्तर ३६ दिनमा सकियो ‘शिवांश : च्याप्टर-१’ को छायांकन

इटहरी/ पोखराको रमणीय स्थलहरूमा खिचिएको नेपाली फिल्म ‘शिवांश : च्याप्टर–१’ ले ३६ दिन लामो छायांकन सकाउँदै इन्ड-क्ल्याप गरेको छ । जेठको पहिलो साता लामाचौरस्थित अकला मन्दिरमा पूजा गर्दै सुरु गरिएको यो फिल्मको सम्पूर्ण दृश्य र गीतहरूको छायांकन पोखरा तथा आसपासमै सम्पन्न गरिएको हो ।

निर्माता अञ्जान केसीका अनुसार पामे क्षेत्रमा खिचिएको “उकुस मुकुस” बोलको गीतसँगै छायांकनको अन्तिम चरण पूरा गरिएको हो । “दिनरात नभनी, बिना कुनै बाधा-अड्चन हामीले छायांकन सम्पन्न गर्न सफल भयौँ,” उनले बताए, “अब हामी पोस्ट-प्रोडक्सनको काममा तीव्रता दिनेछौं ।” अञ्जान सिनेमा प्रोडक्सन हाउसको ब्यानरमा निर्माण भएको यो फिल्म निर्देशक सन्तोष कुमार आत्रेयको डेब्यु निर्देशन हो ।

मुख्य भूमिकामा प्रवीण खतिवडा, तेज गिरी र रुषा न्यौपाने रहेका छन् भने सहायक कलाकारमा विकास जोशी, विमला लिम्बू, प्रदीप कुमार चौधरी, सबिर चुरौटे, उदय कुमार सुब्बा, टिका निरौला लगायतको अभिनय रहनेछ । फिल्मको कथा स्वयं निर्माता अञ्जान केसीले लेखेका हुन् । पटकथा बारत लिम्बूले तयार पारेका छन् भने स्क्रिप्ट डक्टरका रूपमा सुलक्षण भारतीले काम गरेका छन् ।

@parikalanewsofficial

सह-निर्मातामा शोभा भण्डारी र अनिस केसी बोगटी रहेका छन् भने कार्यकारी निर्माता सम्भू थापा हुन् । राजनराज शिवाकोटी र न्ह्यू बज्राचार्यको संगीत, गीत राजनराज शिवाकोटी र विप्लव प्रतीकको रचना तथा स्वरमा राजनराज शिवाकोटी, मिलन नेवार र समीक्षा अधिकारी छन् । द्वन्द्व निर्देशन मिलन श्रेष्ठको, नृत्य निर्देशन विक्रम चोहानको रहेको छ । भिएफएक्स सुपरभिजनमा विराज खड्का र आदेश सुब्बा (गुडरेज पिक्चर्स) छन् । डीओपीमा सरद महतो, प्रमुख सहायक निर्देशक बारत लिम्बू, आर्ट डिरेक्टर प्रतीक चौधरी, प्रोडक्सन डिजाइनर मिलन मानन्धर रहेका छन् ।