फिल्म ‘कोशेढुंगा’को तीज गीत ‘नत्र भने जिन्दगी व्यर्थ छ’ले दर्शकको ध्यान तान्दै

इटहरी/ भर्खरै सार्वजनिक भएको फिल्म ‘कोशेढुंगा’को तीज विशेष गीत ‘नत्र भने जिन्दगी व्यर्थ छ’ले छोटो समयमै दर्शकको ध्यान तानेको छ । नेपाली तीजको मौलिक स्वाद बोकेको यो डान्सिङ नम्बरले युट्युब, फेसबुकदेखि टिकटकसम्म व्यापक चर्चा पाएको छ । गीत सार्वजनिक भएको केही दिनमै युट्युबमा १० लाखभन्दा बढी भ्युज, फेसबुकमा ७० लाखभन्दा बढी भ्युज पुगेको छ भने २० हजारभन्दा धेरै टिकटक भिडियो निर्माण भइसकेको निर्देशक सरोज पौडेलले जानकारी दिए ।

उनका अनुसार गीतले सभ्य मनोरञ्जनमार्फत नेपाली संस्कृति जोगाउने प्रयास गरेको छ, जुन दर्शकले मनपराएका छन् । खेम सेन्चुरी, समीक्षा अधिकारी र दिपिका बयम्बु मगरको स्वर रहेको यस गीतमा नेत्र अर्यालको शब्द र संगीत खेम सेन्चुरीको रहेको छ । विवाहित र अविवाहित महिलाको जीवनदृष्टिकोणलाई गीतमा कलात्मक ढंगले प्रस्तुत गरिएको छ ।

गीतको भिडियोमा सुरक्षा पन्त र नीति शाहले अविवाहित पक्षको कल्पना प्रस्तुत गरेकी छन् भने ऋचा शर्माले विवाहित जीवनको अनुभूति बाँडेकी छन् । गीतले लोकप्रियता पाएको सन्दर्भमा निर्माण टिमले #नत्र_भने_जिन्दगी_व्यर्थ_छ ह्यासट्याग प्रयोग गरेर टिकटक प्रितस्पर्धा घोषणा गरेको छ । अगस्ट २० सम्म सहभागी हुन सकिने यस प्रतियोगितामा उत्कृष्ट प्रस्तुति दिने १ जनालाई ३० हजार, सबैभन्दा रचनात्मक भिडियो बनाउने १ जनालाई २० हजार र सबैभन्दा धेरै लाइक पाउने भिडियो बनाउने १ जनालाई १० हजार पुरस्कारको व्यवस्था छ ।

@parikalanewsofficial

भदौ १२ गतेबाट प्रदर्शनमा आउन लागेको ‘कोशेढुंगा’ नेपाली फिल्म इतिहासमा पहिलो पटक ४२ भन्दा धेरै देशमा एकसाथ रिलिज हुने तयारीमा छ । ‘पूर्ण बहादुरको सारंगी’ निर्देशक सरोज पौडेलको निर्देशन रहेको फिल्ममा सुरक्षा पन्त, आर्यन सिग्देल, ऋचा शर्मा, मञ्जिल कुमार, नीति शाह, प्रवीण खतिवडा, सरोज खनाल, विशाल पहाडी, हिउवाला गौतम, दिनेश काफ्ले र लोकमणि सापकोटाको अभिनय रहेको छ ।

नरदेवी फिल्मसको प्रस्तुति र सारंगी फिल्मसको सहकार्यमा बनेको फिल्ममा प्रेविल कँडेल र किशोर अनुराग निर्माता छन् । दिनेश खड्का कार्यकारी निर्माता, बाबु श्रेष्ठ छायाँकार, नहकुल खड्का सम्पादक, आशिष अविरल र रिदम कँडेल संगीतकार र सुवलमणि सापकोटा कास्टिङ डाइरेक्टरका रूपमा संलग्न छन् । यसलाई अन्तर्राष्ट्रिय बजारमा सेभेन सिज इन्टरनेसनल (प्याट्रिक सुवेदी र रमेश ढकाल) ले वितरण गर्दैछन् । ४२ देशमा एकसाथ रिलिज हुने यो फिल्मले नेपाली फिल्मलाई अन्तर्राष्ट्रियस्तरमा पुर्‍याउने ठूलो अपेक्षा गरिएको छ ।