‘राम नाम सत्य’बाट आयुष सिंह ठकुरीको फिल्ममा डेब्यु, एक्सन प्रशिक्षण लिँदै

इटहरी/ टिकटकमार्फत लोकप्रियता कमाएका कन्टेन्ट क्रियटर आयुष सिंह ठकुरी अब ठूलो पर्दामा डेब्यु गर्दैछन् । निर्देशक माइकल चन्दको निर्देशनमा बन्ने फिल्म ‘राम नाम सत्य’ मा उनी अनुबन्धित भएका छन् । सोमबार फिल्मका निर्माता उपेन्द्र शाही र निर्देशक चन्दले आयुषसँग औपचारिक सम्झौता गरे ।

फिल्ममा अनुबन्धित भएपछि आयुषले प्रतिक्रिया दिँदै, “धेरै फिल्मका अफर आए पनि ‘राम नाम सत्य’को कथा र भूमिकाले मलाई आकर्षित गर्‍यो । यो मेरो लागि पावरफूल डेब्यू बन्नेछ भन्ने विश्वास छ।”भने । निर्माण टिमका अनुसार आयुष केही समयदेखि यस फिल्मका लागि तयारीमा छन् । निर्देशक चन्दका अनुसार, “हामीले आयुषलाई एक्सन प्रशिक्षण दिइरहेका छौं र उनी अब अभिनयको कोर्स पनि सुरु गर्दैछन् । उनको मेहनतले राम्रो नतिजा दिनेमा ढुक्क छौं ।”

साउन २९ गते शुभसाइत गर्दै छायांकन सुरु गर्न लागिएको यो फिल्मलाई एक्सन, सस्पेन्स र प्रेमकथाको समिश्रणका रूपमा प्रस्तुत गरिनेछ । फिल्ममा विराज भट्ट, सुशिल श्रेष्ठ, दिव्या रायमाझी, सुपुष्पा भट्ट, अर्पण थापा, सुनिल थापा, दिनेश डीसी, रवि गिरी जस्ता चर्चित कलाकारहरु यसअघि नै फाइनल भइसकेका छन् । अब एक मुख्य अभिनेत्रीको खोजीपछि कलाकार टिम पूरा हुने बताइएको छ ।

@parikalanewsofficial

उपेन्द्र शाही र श्वेता विमली फिल्मका निर्माता हुन् भने किशोर भट्ट र डा. डीआर उपाध्याय सह-निर्माताका रूपमा रहेका छन् । छायांकन चितवन, काठमाडौं लगायत स्थानमा हुने फिल्मको डीओपी संजय लामाले सम्हाल्नेछन् । फिल्मको संगीतमा अर्जुन पोखरेल र बाबुल गिरी रहनेछ भने प्रोडक्सन कन्ट्रोलर नविन जंग शाह र हेड अफ प्रोडक्सन तेज विक्रम केसी छन् । फिल्म माइकल इन्टरटेन्मेन्ट हाउसको ब्यानरमा निर्माण हुँदैछ ।