भाइरल बन्दै ‘माग्ने राजा’को गीत, नयाँ स्वरूपमा माग्नेबुढा

इटहरी/ नेपाली फिल्म ‘माग्ने राजा’को प्रचार तीव्र बन्दै जाँदा माग्ने बुढा अर्थात् केदार घिमिरेको नयाँ अवतारले दर्शक माझ कौतुहलता चुलिएको छ । पछिल्लो समय सार्वजनिक भएको गीत ‘म त सुतेर उठेको पैसामा’ ले मात्र होइन, त्यसमा देखिएको माग्नेको नयाँ स्वरुपले समेत फिल्मको कथावस्तुप्रति गहिरो चासो जगाएको छ । निर्देशक ऋषि लामिछानेका अनुसार, फिल्मको कथा यसै गीतमा देखिएको फेन्टासीमा आधारित छ ।

उनले स्पष्ट पारे, “पहिला टिजर र लोकगीतमा केदार घिमिरेलाई पुरानै छविमा देखाएका थियौँ, जसले केही दर्शकलाई भ्रममा पारेको थियो । तर अहिले सार्वजनिक गीतमार्फत हामी सिनेमा कहाँ जाँदैछ भन्ने स्पष्ट संकेत दिएका छौँ ।” निर्माता मुनाल घिमिरेले ‘माग्ने राजा’ लाई केवल हाँसोका लागि मात्र नभई सामाजिक सन्देश बोकेको फिल्मको रूपमा परिभाषित गरेका छन् । उनका अनुसार, “हाँसो भन्दैमा हलुका मजाक छैन । हामीले समस्यालाई हाँसोभित्रै संकेत गरेर समाधानतर्फ लैजाने प्रयास गरेका छौँ । यसले फिल्मपछि दर्शकमा बहसको वातावरण बनाउनेछ भन्ने विश्वास छ ।” हेर्नुस् भिडियो ।

पोस्टर रिलिजपछि आक्रामक प्रचारमा उत्रिएको फिल्मले अहिलेसम्म दुई गीत र एक टिजर सार्वजनिक गरिसकेको छ । टिजरले १२ लाख हाराहारीमा भ्युज बटुलिसकेको छ भने ‘म त सुतेर उठेको पैसामा’ गीतले पाँच दिनमै २१ लाख भ्युज पार गर्दै भाइरल बनेको छ । यो गीत टिकटकमा समेत लोकप्रिय बनिरहेको छ, जसले फिल्मप्रति थप आकर्षण पैदा गरेको छ ।

भदौ ६ गते रिलिज हुने ‘माग्ने राजा’मा केदार घिमिरेसँगै विल्सन विक्रम राई, वर्षा सिवाकोटी, शिशिर वाङ्देल, शारदा गिरी, राधिका कँडेल आदिको अभिनय रहनेछ । ऋषि लामिछानेद्वारा निर्देशित र मुनाल घिमिरेद्वारा निर्मित फिल्ममा दीपक शर्मा र बाबुल गिरीको संगीत, नरेन्द्र मैनालीको छायांकन, मित्र गुरुङको सम्पादन र सामीप्य राज तिमल्सेनाको लेखन रहेको छ ।