इटहरी/ भारतीय रियालिटी शो ‘स्प्लिट्सभिल्ला १४’ का उत्कृष्ट ८ प्रतिस्पर्धी अनिकेत पाख्रिन लामा अब नेपाली फिल्म अभिनयमा डेब्यु गर्दैछन् । निर्देशक मिलन चाम्सको निर्देशनमा बन्ने प्रेमकथानक फिल्म ‘सुम्निमा’मा अनिकेत मुख्य भूमिकामा अनुबन्ध भएका हुन् । अनिकेतको फ्यान फलोइङ, आकर्षक व्यक्तित्व र क्यामेरा अघि प्रस्तुत हुने शैलीले निर्माण टिमलाई प्रभावित पारेको निर्देशक चाम्सले जानकारी दिए ।
अडिसन प्रक्रियामार्फत छनोट गरिएका उनले यो फिल्ममार्फत नेपाली फिल्मी यात्राको सुरुवात गर्दैछन् । ‘सुम्निमा’ फिल्म गोर्खा फिल्म्स र चाम्स इन्टरटेन्मेन्टको सह-निर्माणमा तयार हुँदैछ । प्रेममा आधारित कथावस्तु बोकेको यो फिल्ममा यसअघि नै अभिनेत्री उपासना सिंह ठकुरी, अभिनेता कुन्साङ बमजन र अनुप बिक्रम शाही अनुबन्धित भइसकेका छन् ।
फिल्मको कथा राजीव थापाले लेखेका हुन् । ‘सुम्निमा’को छायांकन लन्डन र नेपालमा आउँदो अगस्टदेखि सुरु हुने तयारीमा छ । निर्देशक चाम्सको भनाइमा, नयाँ अनुहार भए पनि अनिकेतमा देखिएको आत्मविश्वासले फिल्मलाई बलियो ऊर्जा दिने विश्वास गरिएको छ ।
@parikalanewsofficial
Discussion about this post