अनिल सिंह भन्छन्, ‘म्युजिक नेपाल र म्युजिक डटकमले मलाई मर्न बाध्य बनाउँदैछन्’

इटहरी/ नेपाली पपसंगीतका चर्चित गायक अनिल सिंहले आफू गम्भीर मानसिक पीडामा परेको भन्दै म्युजिक नेपाल र म्युजिक डटकममाथि गम्भीर आरोप लगाएका छन् । आईतबार सामाजिक सञ्जालमार्फत एक भिडियो सेयर गर्दै उनले यी दुई संस्थाले आफ्नो संगीतिक यात्रा मात्र होइन, व्यक्तिगत जीवनसमेत बर्बाद पार्न खोजेको गुनासो गरेका छन् ।

उक्त भिडियोमा गायक सिंहसँगै म्युजिक डटकमका प्रमुख राजेश वंशल पनि देखिन्छन् । उनले भनेका छन्, “सँधै अग्रिमेन्ट देखाएर मात्र हुन्छ ?” यस्तै प्रश्न गर्दै उनले आफूमाथि भइरहेको अन्यायको पीडा पोखेका छन् । भिडियोमा उनले “म्युजिक नेपाल र म्युजिक डटकमले मलाई मर्न बाध्य पार्छ । किन मेरो करियर र सङ्गीत जीवन बर्बाद पार्दैछ !” भनेको देखिन्छ । हेर्नुस् भिडियो ।
https://www.facebook.com/reel/768355745613171/?app=fbl
गायक सिंहले आफ्नो सामाजिक सञ्जालमा यसअघि पनि यो विषयमा कुरा उठाएका छन् । केही साताअघि पनि उनले म्युजिक नेपालको ज्यादती विरुद्ध नेपाल पुलिस, साइबर व्युरोलाई मेन्सन गर्दै सामाजिक सञ्जालमा लाईभ गरेर बोलेका थिए । उनले म्युजिक नेपाल, म्युजिक डटकम, इमेज च्यानल र इन्द्रेणी क्यासेट सेन्टर मिलेर आफ्नो गीत बेचिएको आरोप यसअघि पनि लगाउँदै भिडियो सार्वजनिक गरेका थिए ।

@parikalanewsofficial

सन् २००० को दशकमा ‘इन्जिन गाडीमा’, ‘आई लभ यू’, ‘प्रेमपत्र’, ‘डुब्न देऊ’ जस्ता हिट गीतमार्फत नेपाली पपसंगीतमा छुट्टै पहिचान बनाएका अनिल सिंह प्रेम, विछोड र भावनात्मक सम्बन्धबारेका गीतहरूका लागि परिचित छन् । नेपाली रोमान्टिक पपसंगीतको शिखरमा उनको नाम सधैं अग्रपंक्तिमा रहँदै आएको छ । तर हाल गायकले सार्वजनिक गरेका ती अभिव्यक्तिहरूले नेपाली संगीत क्षेत्रमा गहिरो बहस र चिन्ताको विषय उत्पन्न गरेको छ ।