शिव रेग्मीको स्मृतिमा निता ढुंगानाको ‘सुखदुःख’, मुख्य भूमिकामा मिथिला शर्मा

इटहरी/ वरिष्ठ अभिनेत्री मिथिला शर्मा नीता ढुङ्गानाको निर्देशनमा बन्ने फिल्म ‘सुखदुःख’मा अनुबन्धित भएकी छन् । अभिनेत्री एवं निर्मात्री ढुङ्गानाको डेब्यु निर्देशनमा शर्मा मुख्य भूमिकामा देखिने भएकी हुन् । आइतबार निर्माण पक्ष र शर्माबीच औपचारिक कागजी सम्झौता सम्पन्न भएको हो ।

यसअघि फिल्मका लागि चर्चित भारतीय छायाँकारहरू कवीरलाल र शाहिदलाल डिओपी अनुबन्ध भइसकेका छन् । तर मुख्य अन्य कलाकारबारे भने हालसम्म निर्माण पक्षले कुनै जानकारी खुलाएको छैन । निर्देशक ढुङ्गानाले केही साताभित्र मुख्य पात्रहरूको नाम सार्वजनिक गरिने बताएकी छन् ।

निर्देशकको रूपमा डेब्यु गर्न लागेकी अभिनेत्री ढुङ्गानाले आफ्नो पहिलो निर्देशकीय फिल्मलाई स्वर्गीय निर्देशक शिव रेग्मीको स्मृतिमा समर्पित गरेकी छन् । केही दिनअघि सामाजिक सञ्जालमार्फत उनले फिल्म ‘सुख–दुख’ को नाम पुनःप्रयोग गर्न पाउनु आफूका लागि गर्वको विषय भएको उल्लेख गरेकी थिइन् । नीताले लेखेकी छन्, “एक गहिरो सम्मानसँगै स्वर्गीय निर्देशक शिव रेग्मी सरको कालजयी फिल्म ‘सुख–दुख’ को नाम पुनःप्रयोग गर्न पाउँदा गर्वित छु।”

@parikalanewsofficial

उनले थप लेखेकी छन्, “श्रीमती ज्ञानु रेग्मी ज्यूबाट अनुमति मात्र होइन, मेरो निर्देशन डेब्युका लागि आशीर्वाद समेत पाउनु… यो मेरो लागि सौभाग्य र प्रेरणा हो । ‘सुख–दुख’ अब केवल एक फिल्म होइन, उहाँको सम्झनामा समर्पित एक श्रद्धाञ्जली पनि हो । शिव रेग्मी सरप्रति आदरपूर्वक नमन, ज्ञानुजी प्रति हार्दिक आभार।” शिव रेग्मीले निर्देशन गरेको मूल ‘सुख-दुख’ नेपाली चलचित्रको इतिहासमा कालजयी मानिएको छ । अब सोही नामको फिल्ममार्फत नीता निर्देशनमा पहिलो कदम चाल्दैछिन् ।

यो फिल्मको निर्माण व्यवस्थापनको जिम्मा शंकर पाण्डेलाई दिइएको छ । ‘नीता फिल्म्स’को ब्यानरमा निर्माण हुने यस फिल्मलाई आगामी वर्षको दसैंको फूलपातीमा प्रदर्शनमा ल्याउने तयारी भइरहेको छ । फिल्मको वितरण अधिकार उपत्यकाबाहिर एफडी कम्पनीले लिएको छ भने उपत्यकाभित्रको वितरण रिच इन्टरटेनमेन्टले गर्नेछ ।