‘अभिमन्यु’को दुई पोस्टर रिलिज, एकातिर रहस्य र अनुसन्धान अर्कोतिर आत्मीय सम्बन्ध

इटहरी/ अल टाइम ब्लकबस्टर फिल्मको ‘पूर्ण बहादुरको सारंगी’ निर्माण टिमले अर्को प्रतिक्षित नेपाली फिल्म ‘अभिमन्यु : च्याप्टर १’ को दुई फरक पोस्टर सार्वजनिक गरेको छ । निर्माण टिमले सोमबार सार्वजनीक गरेको २ पोष्टरले द्वन्द, रहस्य र भावनात्मकताको झल्को दिन्छ । सेभेन सिज सिनेमाको ब्यानरमा निर्माण भएको यो फिल्मलाई भाद्र २७ गते नेपाली र असोज ६ गते हिन्दी भाषामा सार्वजनिक गर्ने तयारी गरिएको छ ।

टिमले सार्वजनीक गरेको पहिलो पोस्टरमा विभिन्न पात्रहरूलाई गम्भीर र रहस्यमय अवस्थामा प्रस्तुत गरेको देखिन्छ । माथिल्लो भागमा ५ जना पात्रहरूको चरित्रलाई छुट्टाछुट्टै फ्रेममा देखाइएको छ, जसबाट कथामा सामाजिक, मानसिक र व्यक्तिगत संघर्षका आयामहरू झल्किन्छन् । पोष्टरको तल्लो भागमा अर्को दृश्य देखिन्छ जहाँ एक जना प्रहरीले हत्कडी लगाएका व्यक्तिलाई सोधपुछ गरिरहेको र त्यसलाई अर्को प्रहरीले क्यामेराले कैद गरिरहेको दृश्यले फिल्मको कथा अनुसन्धान र अपराधसँग जोडिएको संकेत गर्छ । फिल्मको यसअघि रहस्य बोकेको एक पोष्टर र मोसन टिजर सार्वजनीक भइसकेको छ ।

यस्तै दोस्रो पोस्टर भावनात्मक र आत्मीय छ । रातको समय, थुप्रै दियोहरुमा बत्ति बालिएका छन्, जहाँ फिल्मका २ पात्रहरू मुस्कानसहित ती बत्तिहरू बालीरहेका छन् । यसले सम्बन्ध, संस्कृति, प्रेम र परम्पराको पृष्ठभूमि बोकेको गहिरो सन्देश दिन्छ । यस पोस्टरमार्फत कथाको सौन्दर्य र संवेदनात्मक पक्षलाई प्रष्ट्याउँछ । फिल्ममा कामेश्वर चौरासिया, सरिता गिरी, गौमाया गुरुङ, लक्ष्मी बर्देबा, शिशिर वाङ्देल, किरण श्रेष्ठ, प्रकाश दाहाल र सुष्मा निरौला मुख्य भूमिकामा छन् ।

यो फिल्म ‘अभिमन्यु: च्याप्टर १’को निर्देशक सुषान्त गौतम हुन् भने लेखक मुकेश खनाल हुन् । विनोद पौडेल र गुन्जन गिरी निर्माता रहेको फिल्मको कार्यकारी निर्माताहरूमा विशाल लामा, हरि मोक्तान, कृष्ण भट्टराई, निराजन लुइटेल, सन्देश श्रेष्ठलगायत छन् । रमेश चौलागाईं र हरी श्रेष्ठ सहायक निर्माता हुन् । एनबी महर्जनको एक्सन निर्देशन, सरद महतोको डिओपी, रोशन विश्वकर्माको कोरियोग्राफी र मदन घिमिरेको सम्पादन यो फिल्ममा रहेको छ । फिल्मलाई डिजिटल सिनेमा नेपाल र कुबेर सिने डीस्टीव्युटरले वितरणको जिम्मा लिएको छ ।

@parikalanewsofficial