‘क्याप्टेन साब’ को छायाङकन सुरु

इटहरी/ क्याप्टेन रामेश्वर थापाको जीवनमा आधारित फिल्म ‘क्याप्टेन साब’को छायांकन काभ्रेको ढुंखर्क, बेथानचोकबाट सुरु गरिएको छ । शनिबारदेखि औपचारिक रूपमा छायांकनको काम अगाडि बढाइएको यो फिल्मको शुभमुहूर्त भने असार २६ गते काठमाडौंको गौरीघाटमा सम्पन्न गरिएको थियो । दीपेन्द्र के खनालको निर्देशनमा तयार हुँदै गरेको यो बायोपिक फिल्ममा खगेन्द्र लामिछाने, सुरक्षा पन्त र सञ्जोग रसाइली प्रमुख भूमिकामा देखिनेछन् ।

खनाल, खगेन्द्र र सुरक्षाको त्रिकोणीय सहकार्य यो फिल्ममार्फत पहिलोपटक देखिँदैछ, यद्यपि खनाल र खगेन्द्रले यसअघि पनि सँगै काम गरिसकेका छन् । ‘धनपति’ पछि खगेन्द्र र सुरक्षालाई पुनः एउटै पर्दामा ल्याउने प्रयासस्वरूप निर्माण गरिएको ‘क्याप्टेन साब’ पाइलट, व्यवसायी तथा सञ्चार उद्यमी रामेश्वर थापाको संस्मरणात्मक कृति इन्टु द फायर (बारुदमाथि उड्दा) मा आधारित छ ।

निर्देशक खनालका अनुसार यसमा थापाको जीवनका उतारचढाव प्रस्तुत गरिँदै सिनेम्याटिक लिबर्टीमार्फत मनोरञ्जनात्मक र भावनात्मक पक्ष पनि जोडिनेछ । पटकथा प्रोडक्सन, यार्सा स्टुडियो र रिच इन्टरटेन्मेन्टको संयुक्त प्रस्तुति रहेको फिल्मका निर्माता निर्देशक खनाल स्वयं, करण श्रेष्ठ र श्रृष्टिमा खनाल हुन् । कार्यकारी निर्माताको जिम्मेवारी सिर्जना नापितले सम्हालेकी छन् ।

@parikalanewsofficial

कृष्णबहादुर थापा छायाकार रहेको फिल्मको छायांकन काठमाडौंसहित चितवन, काभ्रे र वीरगञ्जमा हुनेछ । फिल्म निर्माण टोलीमा सहायक निर्देशक सौगात बस्नेत, पब्लिसिटी डिजाइनमा रोयल भीमसेन (ट्राइडेन्ट कन्सेप्ट), प्रोडक्सन डिजाइरमा एकी थेक्पा, र प्रोडक्सन म्यानेजरमा रोहित राज गौतम र बिष्णु बुढाथोकी रहेका छन् ।