इटहरी/ गणतन्त्र स्थापनाका लागि भएका ऐतिहासिक आन्दोलनहरू अब फिल्मको पर्दामा उतारिने भएका छन् । सत्य घटनामा आधारित नेपाली कथानक फिल्म ‘जनक्रान्ति’ निर्माणको तयारी सुरु भएको छ । शनिबार फिल्मको पहिलो पोस्टर सार्वजनिक गरिँदा, उद्घाटनको अवसर पाएका थिए गणतन्त्र नेपालका प्रथम प्रधानमन्त्री पुष्पकमल दाहाल ‘प्रचण्ड’ले ।
पोस्टर सार्वजनिकपछि प्रचण्डले नयाँ पुस्तालाई गणतन्त्र स्थापनाको संघर्ष र त्यसपछिको सामाजिक, राजनीतिक तथा आर्थिक परिवर्तनको ज्ञान दिन यो फिल्म महत्वपूर्ण हुने विश्वास व्यक्त गरे । “हिजोको समाज कस्तो थियो भन्ने कुरा युवापुस्ता बुझ्न जरुरी छ, ‘जनक्रान्ति’ त्यो सेतु बन्न सक्छ,” उनले भने ।
रुद्राक्ष फिल्म्स प्रा.लि.को ब्यानरमा निर्माण हुने फिल्मको निर्देशन उपेन्द्र तिमिल्सिनाले गर्नेछन् । निर्माता रुद्र प्रसाद खनालका अनुसार फिल्मको छायांकन भाद्र दोस्रो साताबाट सुरु हुने छ भने प्रदर्शन मिति फागुन १ तय गरिएको छ ।
@parikalanewsofficial
निर्देशक तिमिल्सिनाका अनुसार फिल्ममा गणतन्त्र स्थापनाका लागि भएका विभिन्न आन्दोलनहरूको कथा समेटिएको छ, जसले विशेषगरी युवाहरूलाई नेपालको राजनीतिक इतिहास बुझ्न सजिलो बनाउनेछ । ‘जनक्रान्ति’को छायांकन स्थानहरूमा रुकुम, रोल्पा, जाजरकोट, जुम्ला, कालिकोट, बाँके, बर्दिया, धनकुटा, खोटाङ, भोजपुर र सर्लाही रहेका छन्, जहाँ ती ऐतिहासिक आन्दोलनहरूका वास्तविक छायाँझल्को पाइन्छ ।
Discussion about this post