फिल्म‘भाइटीका’को लागी रेखा थापा, विपिन कार्की र धीरज मगरसँग कागजी सम्झौता

इटहरी/ तिहारको अवसरमा दाजु-बहिनीबीचको सम्बन्धलाई केन्द्रमा राखेर तयार हुँदै गरेको नयाँ नेपाली फिल्म ‘भाइटीका’ मा अभिनेत्री रेखा थापा, अभिनेता विपिन कार्की र धीरज मगर मुख्य भूमिकामा देखिने भएका छन् । पारिवारिक संवेदनाले भरिएको यो फिल्म रोहित अधिकारीको निर्माणमा बन्नेछ । यी तीनै जनालाई निर्माण युनिटले कागजी सम्झौता गरेको पुष्टि निर्माता अधिकारीले गरेका छन् ।

पहिले रेखा र विपिनको नाम सार्वजनिक भइसकेको थियो भने धीरज मगर पनि फिल्मसँग जोडिएको चर्चा चलेको थियो । तर आधिकारिक पुष्टि भने भएको थिएन । दीपक वलीको निर्देशन र महेश दवाडीको पटकथा रहने ‘भाइटीका’ले २० वर्षदेखि टीका लगाउन नपाएका दाजु-बहिनीको गहिरो भावनात्मक सम्बन्धलाई कथानकको मूल स्वरूप बनाउनेछ ।

@parikalanewsofficial

यो फिल्ममा रेखा र विपिन दाजुबहिनीको भूमिकामा देखिनेछन् भने धिरजको भूमिका खुलाईएको छैन् । फिल्मको छायांकन यो वर्षको अन्त्यतिर सुरु गरिने र आउँदो वर्ष २०८३ सालको तिहारमा प्रदर्शन गर्ने तयारी रहेको निर्माता रोहित अधिकारीले जानकारी गराए । यसैबीच, निर्माता अधिकारीको अर्को बहुप्रतिक्षित फिल्म ‘माइतीघर’ हाल पोस्ट-प्रोडक्सन चरणमा रहेको छ, जुन यही आउँदो दशैंको फूलपातीमा सार्वजनिक प्रदर्शन गरिनेछ ।