विजय, गौरव, मिरुना र केकीको ठुम्का सहित ‘जनै हराएको मान्छे’को गीत सार्वजनिक

इटहरी/ अभिनेता विजय बरालको प्रमुख अभिनय रहेको बहुप्रतिक्षित फिल्म ‘जनै हराएको मान्छे : सम्बन्धका धागाहरू’ को पहिलो गीत सार्वजनिक गरिएको छ । ‘मसुरीको दाना’ बोलको यस गीतले प्रेम र सम्बन्धका गहिरा भावनाहरू दर्शाउँछ । अञ्जु पन्त र एसडी योगीको सुमधुर स्वर रहेको गीतमा हर्क साउदले शब्द भरेका छन् भने संगीत एसडी योगीको छ ।

कोरियोग्राफर सुनिल क्षेत्रीको रहेको गीतको भिडियोमा विजय बराल, केकी अधिकारी, मिरुना मगर, गौरव पहाडी लगायत फिल्मका मुख्य कलाकार देखिन्छन् । गीतमा प्रेमिल जोडीहरूको मनोदशा, उनीहरूको अन्तरविरोध र जीवनका संघर्षहरूलाई सजीव रूपमा उतारिएको छ । विशेषगरी प्रेमिकाको दृष्टिकोण प्रस्तुत गर्दै तयार पारिएको गीतमा प्रेममा आफ्ना अपेक्षा र वास्तविकता कसरी ठोक्किन्छन् भन्ने पक्षलाई सरल तर भावनात्मक शैलीमा अभिव्यक्त गरिएको छ । हेर्नुस् भिडियो ।

प्रेमीको एक झल्कोले हुरुक्क हुने, सँगै जीवन बिताउने चाहनाजस्ता प्रसङ्गहरू गीतमा समावेश छन् । भिडियोमा ठूलो संख्यामा कोरस प्रयोग गरिँदा पनि गीतको भाव क्षीण भएको छैन । विशेषगरी विजय बरालले नृत्यमा गरेको प्रयास प्रसंशायोग्य छ, जसले गीतको भिडियो अझै प्रभावशाली बनाएको छ । हिमाल न्यौपानेको निर्देशनमा तयार भएको यो फिल्ममा विजय बरालसँगै केकी अधिकारी, मिरुना मगर, गौरव पहाडी, सुशांक मैनाली, भोलाराज सापकोटा, रियर राई, भावना खपांगी मगर लगायत कलाकारको अभिनय छ ।

भानुभक्त ढकालको कथा, पटकथा र संवादमा बनेको फिल्म पेपरक्लिप ब्यानर अन्तर्गत कमल न्यौपाने र विमल न्यौपानेले निर्माण गरेका हुन् । मनिष राउत एसोसिएट निर्देशकको भूमिकामा छन् । कार्यकारी निर्मातामा नारायण तिमसिना, चुडामणि सिवाकोटी, आरके मानन्धर, सिआर बस्नेत, फिलिप डिसी र जेम्स महाराजन छन् ।

@parikalanewsofficial

फिल्मको सम्पादन भरत रेग्मीले, टिजर–ट्रेलर निर्माण शाहिल खानले, कलर सुप्रिम पराजुलीले, एक्सन निर्देशन चुल्ठे काजीले गरेका छन् भने निर्माण नियन्त्रक लक्ष्मणराज पौडेल हुन् ।फिल्मको वितरण अधिकार गोविन्द शाहीको काफिया फिल्मसले लिएको छ । ‘पूर्णबहादुरको सारङ्गी’मा उत्कृष्ट अभिनय गरेर चर्चा कमाएका विजय बराल पुनः मुख्य भूमिकामा देखिन लागेको यो फिल्मलाई दर्शकहरूले यस वर्षको महत्वपूर्ण नेपाली फिल्मको रूपमा लिएका छन् ।